Hold My Hand

Naupang kal tir thei ngawr ngawr kan nih lai pawhin kan nu leh pa te kut vuanin kan kal a. Kut min vawn saktu te leh kut kan vawnsak te chu min hmangaihtu leh kan hmangaih te anni thin. Kut kan invawnsak rualin kan inhmangaihna tih lanna a ni thin. Kut invuan meuha kan kal tawh chuan kan inngaina in kan inhmangaih a; kan tana mi hlu leh pawimawh ber ber te nen chuan kut kan invuantawn fo a nih hi.

Nula tlangval kan lo ni a; mi pangngai nita fam chuan duh leh hmangaih kan lo nei a. An kut kan vawnsakin kan inhmangaihna chu kan tilang thin a nih kha. Kut kan invuan satliahlo a, kan inringtawnin kan ngaintana leh an mahni ah kan innghat tlat a ni tih a tilang a. kan bula awm reng tur leh kan harsat mangan lai pawha min kalsan lo tur leh min chelh reng turin kan duh zia tih lanna a ni thin.

Kan damlo nikhua te, kal hlei theiloa kan awm lai te in kan kutah vuanin min tanpui a. Kan duhna leh tih duh kan neih te chu hmangaihna nena kan kuta vuanin kan tih theih phah thin. Tar chaklo leh puih ngai kan lo nih tawh hnuah pawh kan hmangaih leh min hmangaihtute chuan kan kuta vuanin kan kal duhna ah min hruai a.  Min tanpuina zarah kan tihtur te leh kan duhna hmunah te kan kan kal in thil kan tih theih phah thin a ni  - kan kut kan invawn sak avangin.

Mihring kan nih chhungin harsatna leh buaina kan tawk fo a; lunngaihna leh thihna ten min tlakbuak thin. Chung hun harsa leh kan mangan lai ber pawh chuan min hmangaihtute chuan kan bulah awmin kan harsatna lak ata min tanpui a min hnem tumin kan kutah vuanin min tanpui thin.

Keinin kan ven ve loh lai te, min vuan tih pawh kan hriatloh lai te pawhin Lal Isua chuan kan kut hi a vuan tlat a. Harsatna thuk ber kan tawh lai te, hlimna vawrtawp kan chunga a lo thlen laite pawhin Ani chuan rinawm takin A kutin min vuan tlat a. Kan tana tha tur bera kawng min siamsak leh min buatsaihsakah chuan kan kal hram hram theih nan hmangaihna kut in min chelh tlat a nih hi.

I hmangaih ber nena kut invawnsak hlut zia hre chiang bertu chu nang leh kei kan ni a. Chatuan thlenga kan kut min vawnsak tu Lal Isua kut tlawm tak, kilhna thirkhenin a ti ser leh keimahni vanga thisen chhuak tawh kut hi kan hnar reng dawn em? He kut tlawm tak hi vawikhat tal han vuan let chin la, i damchhungin i thlah phal tawhlo ang a. He kut vuan chung hian khawii hmunah pawh i himzia i hre ngei ang.

Kut pahnih kan nei a; pakhat zawkin Lal isua hi vuan tlat ila, a lehlam hian kan hmangaihte kut chu vuan tlat bawk ila. Chuti chuan he khawvelah hian manganna leh harsatna lo thlen chang pawhin thlah lo in vuan tlat ila. Lal Isua kut kan vawn chhung chuan engkim hi kan paltlang thei dawn si a.


Vawiina ka kut pahnih neih te hi i tan leh Lal Isua tan ka phar chhuak ve ve duh a. Ka theihtawpa nghetin Lal Isua min hmangaihna kut chu ka vawn tlat theih nan nangpawhin i kut lehlam khan Lal Isua kut chu min vawnpui ve tlat la. He khawvel kan damchhung hun reilo te hi Lal Isua kut vuan dun tlat chunga hman zawh hi ka duh a ni. Chumi tur chuan kan kut hian Lal Isua vuan tlat in invuan tawn ang aw? 
Next
This is the current newest page
Previous
Next Post

1 comment:

Thanks for your comment.