TUICHHUNG NULA(Mermaid)


TUICHHUNG NULA(Mermaid)

★Opeey-a Khiangte

Mermaid chu hmasang thawnthu (legend)-a tuia cheng thin niin, a kawnga chin chung lam mihring, hnuai lam sangha a ni. Mermaids hi khawvel hnam thawnthu (folklore) hrang hrangah kan hmu thei ang. Near East, Europe, Africa leh Asia khawmuala ram hrang hrang thawnthuah hmuh tur a awm nuk mai a ni.

Mermaid tih hi Old English thu mal, 'mere' (sea), leh 'maid' (a girl or young woman) tih atanga lakchhawn a ni.

Mermaid thawnthu kan hriat hmasak berna chu ancient Assyria thawnthuah a ni a, chu thawnthuah chuan, Pathiannu (goddess) Atargatis chuan tihpalh thilthuah a ngaihzawng, mihring a thah hlauh vangin, amah chu mermaid-ah a intichang ta a ni.

Tui chhung nula (mermaids) kan ti tlangpui a, mahse, thawnthu thenkhatah chuan, tui chhung tlangval (mermen)-te pawh kan hmu nual mai bawk si a ni. Mermaids  hi thawnthu leh record-a a lan dan chuan, tuifawn nasa tak/tuilian (floods), thlipui (storms), lawngchhia (shipwrecks) leh tuitla chanchin nena kalkawp tlat thin a ni a.

Hnam thenkhat thawnthuah chuan, thilphal tak leh nunnem tak, mihringte pawh rawn ngaizawng thin niin a inziak bawk. Chutih rualin thenkhatah chuan, ramsa rapthlak (monster) an ni a, an zia leh nihphung thup nan Mermaids angin an inlar thin niin a inziak thung a ni.

Mermaids-te hi Greek thawnthu (myth) a, tuia ramsa awm thin sirens te, sirenia te, dugongs te leh manatees te nena inlaichin riau thin a ni bawk.

America khawmualpui hmuchhuaktu, Christopher Columbus pawh khan Caribbean a hmuhchhuah lai vel khan, mermaids a hmuh thu a lo reported tawh a ni.

Chu bakah, mi dang pawhin an hmuh thu chu, 20th century vel khan an lo reported tawh a. 21st centuries vel khan Canada, israel leh Zimbabwe-ah report a awm bawk.

Mahse, U.S. National Ocean Service chuan kum 2012 khan, "mermaids awm tih nemnghehna tur thu chiang engmah a awm lo" tih a puang a ni.

Tun lai (21st century) hian Mermaids hi art leh literature subject-a lar tak a lo ni ta a. Chutiangin, Hans Christian Andersen chuan fairy tale lar tak "The Little Mermaid" (1836) a phuah a. Chu chuan, a hnuah operas, paintings, books, films leh comics lamah entawn a hlawh ta hle a ni.

Mermaids film leh thawnthu phei chu tam tak hmuh tur a awm tawh a. Mite mitla tak leh bengverh tak an nih avangin, sum lakluh nan pawh tha tak a tling nghe nghe.

Sirenia - Sirenia chu tuia awm niin, hnim ei chi a ni. Luipui, vaukam hnaih, dum leh hmun hnawnga awm thin an ni. Sirenians kan tihah hian, manatees leh dugongs a tel bawk.

Heng rannungte hi mid-nineteenth century vel khan lawngmite chuan mermaids-ah an lo ngai tawh thin a ni.

Greek legend lar tak pakhatah chuan,Alexander ropuia unau nu,Thessalonike-i chu a thih hnuin mermaid-a a chan thu kan hmu bawk. Engpawh chu lo ni se, heti tak maia khawvel hmun hrang hrang thawnthu a, a lar theih chhan leh hriat a hlawh em em chhan hi ngaihtuah chian chuan, tun hmain, mi thenkhatin mermaids an lo hmu tawh thin a nih a rinawm hle a.

A taka hmuh thute pawh record a awm nual reng bawk a ni. Lawngmi (mariners)-te leh khualzin te pawhin tuifinriat hmun hrang hranga an hmuh thu an lo sawi fo tawh thin a ni. Mermaids te hi a chang chuan, a huhova rawn inlarin, mihring hmuh theihah an rawn awm ve zeuh thin niin an sawi bawk.

Thenkhatin, hmeltha tak tak nia an sawi laiin, thenkhat dangte erawh chuan mihring hmel leh ramsa hmel inpawlh, rapawm tak niin an sawi thung a ni. Film thenkhatah chuan Tuichhung nula bakah tuichhung tlagvalte pawh kan hmu ve zeuh zeuh thin bawk.

Ngaihruatna film leh story tam taka a lan dan chuan, heng mermaids/mermen-te hian thiltihtheihna ril tak an neih bakah, tui chungah thu nei tak an ni bawk.

Mermaid ruang (dead body) chu May 27, 2012 khan Animal Planet ah kan hmu a, June 17 khan Discovery Channel ah kan hmu bawk. Hei hian a tihlan tak chu scientific team ten Tui hnuai lama thil mak awm chanchin hrang hrang hai chhuak turin theihtawp an chhuah tihna a ni.

Crescendo chuan MONSTER WEEK Programme-ah ti hian a sawi thar ve ta tlat mai le... MERMAIDS taksa hmuhchhuah film ti mai ila, chu chu "Theory of evolutionary possibility" chungchang a ni a.

He Aquatic Ape Theory hian, "Mihringte chu tun hmain aquatic stage ah kan lo awm tawh thin a ni" a ti a ni. Chumi awmzia chu, mihringte hi tun hma chuan tuna awm kan ni a, hun a lo inher zel hnuah khawmuala cheng chi nunna neiah kan lo chang ta a ni.

Kum Nuai tam liam ta khan tuifinriat kam hnaivai vela tui chu nasa takin a fawn a, a so sang but but mai a ni. Chutia tuipui sosan lai chuan mihringte thlahtu, tui chhunga nungcha chi khatte chu khawmualah an rawn chhuak ta a ni.

Ni mah sela, Chung mihring thlahtu nungcha zinga group khat chu khawmualah rawn chhuak ve duh lovin, tuifinriat thuk lamah an kir leh ta hlauh thung a ni. Khawmuala chhuak zawng zawng chu hun rei tak hnuah, zawi zawiin mihringah an chang ta a, Chung tuipui thuka let leh tate chu tuna Mermaids kan tih angho hi an lo ni ta a ni.

Mihringte hi mermaids thlah ti zawnga han chhui chuan, thil awm thei ve tak tak leh, awihawm tak tak, mi tam tak hmin theih khawpa tanhmun tha leh evidence nghet fe fe pawh a tam ve thei viau mai.

Scientist ropui, Darwin-a'n "Theory of evolution" (Zawng atanga mihring rawn piang chhuaka a sawi) nen pawhin a inkalh ve leh hle a ni. Sangha thlah leh Zawng thla tih ringawt pawh hi inhnialna thlen thei tak a ni awm e. Navy lam pawhin vawi tam fe chu mermaids an hmuh thu an lo report tawh thin bawk a, mahse, an thlalak erawh hmuh tur a vang hle thung si a ni.

Ngaihruatna mai mai erawh chu a nih hmel chiah tawh si lo va. Mi fing pui pui leh patling dawt sawi awmlo hliah hliah, mi tam takten an hmuh thu hi an lo sawi fo tawh bawk si a ni!

Tunah rih hi chuan Mihringte leh Mermaids chu, chhul khat kual kan nih leh nih loh lam ai mahin, an awm tak tak em tih fiahna tur thil kan mamawh a, chumi hre chiang tur chuan kan mi thiam thenkhatte pawhin thil an zir chiang mek zel bawk a ni.

Mermaids bakah, ramsa dang maksak tak tak, rul ang deuh si, a lu sakawr ang tak ni si te pawh mi thenkhatin vaukamah an hmu fo thin bawk a. Tuifinriat chhungrilah khuan, Thil mak tak tak zawng a awm chiang a ni tih a hriat theih a ni.

Kum 1997 khan, National Oceanic Atmospheric Administration (NOAA)-a Scientist te chuan Pacific Ocean thuk tak atanga rawn chhuak ri mak tak mai an hria a, chu chu khawlin an lo record a. Chu chu mermaids riva ni ngeiin an ngai a.

Mahse, chiang taka prove turin, chhui ngaihna a la awm hrih lo a ni. Mi thiamte chuan,  Tuihnuai thuk lamah mihring ang deuh nunna nei, thiltithei bawk si hi an awm ngei an ring tlat a, hun rei tak atang khan an lo thlithlai ru reng tawh thin a. Mahse, mermaids hmuh tur erawh a awm thei tawh lo chu a nih hi.

An lo awm ngei a nih chuan, engvanga rawn chhuak duh ngai miah lo nge an nih ang? Dolphin te,  shark te, whale te pawh tuifinriat chunglangah hmuh theihin an rawn inlar fo si a. Engvang nge anniho chu an bikbo bik tlat chu le? Chu pawh chu lo ni ta tehreng se....Khawi lai tuipui hnuaiah tak hian awm ang maw!

A huhova awmin hmun khatah an inbawkkhawm nge ni ang, tuifinriat thuk lai hmun hrang hrangah, mihringte pawh hmun hrang hranga kan awm ang hian an tla darh ve thei tho bawk. Mi tam takina an thilhmuh thin chu Mermaids an lo ni ngei a nih ngai chuan, hmun hrang hrangah an awm nualin a rinawm.

An rawn inlan leh hun a nghahhlelhawm tak meuh meuhva, hriat chian lehzual chakin kan thlir reng zawng a la nih hi.......[opeey1khiangte7@gmail.com]

★★★



Previous
Next Post

No comments:

Thanks for your comment.