COWBOY CHANCHIN [Cowboy Historical & Dresses]


COWBOY CHANCHIN [Cowboy Historical & Dresses]

SPECIAL POST

★Opeey-a Khiangte

COWBOY hi ngaisang leh ngainatu tan lo chuan thil ninawm tak a ni ve thin. A ngainatute tan erawh thinlung leh rilru chawkphur a, lairil tiharhthar lehtu tha tak a ni thung.

An hun lai ngaihtuahkir hian a lungluenthlak em em a, Tawng pha ve lo leh hmu pha ve lo mah ni ila, lung a dum hle thin a ni.

Bawngrual leh Sakawrrual vengin Cowboy hun lai hi chuan an hmanhlel hle thin. Eizawnna tha tak a nih tlat vang a ni.

Movie lam kan en chuan, Sakawr leh Bawng vengtu ni ve kher lote pawh Cowboy inthuamin an inthuam fur thin. a chhan ber chu, he inthuamna hian an hnam nun a chiah hneh hle tihna a ni.

Heng hun lai hian Suamhmang te, rukrukna te, tualthahna te a hluar hle a. chumi laka invenghima, bungrua leh ran venghim thei tur chuan, Silai kah thiam tak, Pistol phawi rang zet nih a ngai thin.

Ngam leh ngam chu, Fair taka Pistol pai ve vein, inring ren rawn sa ve vein an inkap (draw) ta thin a. hetah tak hian Pistol phawi ran a pawimawh ta hle mai a. a rang lo zawk tan erawh chatuan thihna a ni tawh si a ni.

Khaw tinin, mahni khaw enkawltu Police ang deuh hi an nei ve vek a. chungho chu 'Sheriff' tih an ni a, an kawr hma lamah, Sheriff an ni tih chhinchhiahna 'Batch' bial ker chu an bel va va thin a, mite zah an kai em em mai thin a ni.

Sawrkar rawn dah an ni. Anni hi khawchhung leh an huam chinah mawhphurtu an ni a. misualte chu manin, Lock up-ah an khung ve thin a, chuta thiam loh changtute chu Dawhsan (Gallow)-ah, mipui hmuh laiin Khaihlum an ni ta thin a ni. 

Misual, sawrkarin man tuma a zawn mekte hi 'Wanted' tih an ni a.
Dan kalha che thin an nih avangin, 'Outlaw' tih an ni deuh kher thin. Outlaw-ho hi mi tawrawt, tualthah leh rukru bawraw tak tak an nih thin avangin, Sawrkar chuan man a tum hle thin a. man an harsat thin em avangin, nung chung kher lo pawhin, thah theih chuan thah phalna dan siam a ni a.

Lu man an nei tam thin hle. chuti a nih avang chuan, Mihrat khawkheng leh Cowboy phawi rang tak takte'n Outlaw-ho chu an pel ta thin a. an thah tam leh sum an hailut tam ting a ni ta mai thin a ni.

Cowboy phawi rang lutuk leh silai kah thiam tak, kei ka ni inti chinte hi chu Pa rothap pui pui an ni thin a. Pasaltha huaisen leh chhel em em an ni bawk thin a, hmachhawntute chu vui liam an ni chawk. heng hun lai hian Sakawr Tawlailir an hmang nasa thin hle a, bungraw thiar vel nan leh official deuhhote chuanna a ni.

Chutih laiin, Ram inchuh vang leh chhan hrang hrangte avangin, Native American (Red Indian)-ho leh Cowboy-ho hi an inngeih vak thin lo a. buaina a chhuak fo va, an inrun chiam thin a ni. Red Indian-ho hi Indian tiin an sawi mai thin a, an kawlhsenin, hlauh an nei lo hle a. 

Cowboy-ho tan pawha tawrhhlelhawm tak an ni.
Hman lai Mizote ang deuha, chai mup mup thin an ni a, ral beih leh inrun hi an nuna bet tel tlat a ni.

'Cowboy' tih hi Ran vengtu tihna a ni a, North America-a Ran vulhna ram zau takah ran an veng thin a ni. Bawng vengtu pawh kan ti thei tho bawk ang. Sakawr chung chuangin ran an khalhkhawm thin a ni. 

Kum zabi 19-na tawp lama American cowboy-te kha, Northern Mexico-a vaquero Tradition atanga lo inirhchhuak a ni a. Chuta tang chuan, Cowboy nihphung chu a lo danglam chho ta zel a ni. Cowboy sawina chi khat 'wrangler' te chuan Sakawrrual an veng thung.

Ran vulhna Huan lama an hnathawh bakah, cowboy thenkhat chu Rodeo-ah an tel ve bawk thin a ni. Chutih rualin, Cowgirls tih thu pawh hi kum zabi 19-na tawp lam khan an lo lang ve tan bawk. South America leh Australia-ahte chuan ran vengtuah an tang ve thin a, cowboy-ho thawh ang tho an thawk a ni.

Cowboy culture bulpui hi Spain culture leh America khawmuala tun hmaa European lo cheng hmasate culture atanga inherchhuak a ni a. 

Kum za tel a liam hnu chuan, Chenna hmunhma avang te, Sik leh sa avang te leh Ran vulh dan avang tein, Cowboy inthuamna pawh a lo danglam chho ta zel a ni.

'Cowboy' tih thu mal sawifiahna hrang hrang hi a tam hle a, mahse, a kawhtum a inan deuh fur hlawm avangin, chung zinga pakhat chauh chu han sawi rih phawt ila.

English word 'cowboy' tih hian tobul (origin) a nei nual a. Kum, Ranrual enkawl, tihte chu a awmzia ber a ni. Kum 1725 khan "cowboy" tih thu mal hi Sap Tawngah a lang tawh a. 

Spanish thu mal Vaquero tih chu Sap tawngin an letling ni berin a lang.
Spanish tawnga a awmzia chu, Sakawr chung chuanga Ranrual vengtu tihna a ni. vaca tih hi Bawng "cow," tihna a ni a, chu chu Latin word 'vacca' tih atanga lakchhawn a ni.
-------------------------------------------------------

♣ HISTORY 🔫

Cowboy tradition hi Spain atanga chin chhuah a ni a. Tichuan, Ranrual ven hna chu Iberian peninsula-ahte an ching chho zel a, a hnuah, America ram a thleng ve ta a ni. Heng ranrual an enkawlna hmun hi hnim awm khat em emna hmun a ni a. Kea ranrual ven chu a harsa a, Sakawr chung chuangin an enkawl ta zawk a ni.

Sap tawng hmang sumdawngho Khawthlang lamah an lut thla a, English leh Spanish traditions, language leh culture te chu a lo inpawlh ta nuk mai a ni. 

Kum 1848-a Mexican-American War thlen hma khan, England sumdawngho chu Lawngin California-ah an lut a.  hacendados leh vaqueros te nen indawrin, Bungrua leh Savun an inthleng kual ta thin a.

American sumdawngho, tuna SantaFe Trail an tih takte pawh chuan vaquero-ho hi an tlawhpawh hle bawk. chung avangte chuan vaquero tradition leh English cultural tradition chu a inpawlh ta a. Tichuan, tuna American culture-a  "cowboy" kan tih hi a lo chhuak ta a ni.English tawng hmangho hi Texas-ah kum 1821-ah an khawsa tan a.

A bik takin, Relkawng siam hnu, American Civil War laia Bawngsa hralh a kal hun lai khan,  tradition hlui chu Ranvulh enkawl nan an tuaithar leh a ni. Kum 1880 chho vel khan,   cattle industry a lo tam ta hle a, Ranvulh pawh a tam belh a lo ngai ta zel a.

Hmarthlang lam hawiin Ranvulh chu a lar phei zel bawk a ni. Texas ranrualte chu hmar lam, Rocky Mountain leh Dakota velah ven leh enkawl thin a ni a. industry-in hma a sawn zel angin, Cowboy tradition pawh chu a pawimawh ta hle a ni.

A lehlamah chuan, Khawthlang ramah khuan Hmeichhiate pawhin Ranrual an veng ve thin a. chungho chu Cowgirl an ti ve mai thin. Tun hnai khan National Cowgirl Museum leh Hall of Fame chuan beihpui thlakin, Cowgirl-ho sulhnu an chhuikir vak a. chung atang chuan Cowgirl an lo awm ve thin ngei thu kan hrechiang thei ta a ni.

Kum 1880 chho va Thirhling (Barbed wire) siamchhuah a nih khan, Phul leh hnim chereu chak lutuk tur ven nan, Ranrual chu Thirhling hung chhungah khung an ni ta thin a.

Texas leh a chhehvelah chuan, an ranrual ven that a lo tul ta hle a, mimal rama an tlat luh loh nan khung deuh chawt an ngai ta a ni ber. Hmar lamah phei chuan, hnim leh phul a chereu nasa hman hle a, ranin eitur an nei ta mang lo va. kum 1886–1887 vel phei kha chuan an tam (tram) tawh hle a ni.

Ran za tam an thi ta phawk phawk a, cattle industry pawh a lo tluchhe tan ta a. kum 1890 vel khan,barbed wire hmanga ranvulh khung chu northern plain ah chuan an thupui ber a ni tawh. Relkawng pawh a lo tam zel a, meat packing plant te chu Ranvulhna bul velah siam a ni ta a. Ranrual thui tak taka khalh chu an bansan tan a, Cowboy hun chu a lo chuai ta a ni.
-------------------------------------------------------

♠ COWBOY ATTIRES 🔫

Cowboy thuam tam takte hi a chang chuan, Western wear titein an sawi thin. Chung zinga tam tak chu Mexican vaqueros-ho inthuam thinna atanga lakchhawn an ni a, thenkhat chu Native American (Red Indian)-ho thuam copy te pawh a ni hlawm. Chung Cowboy thuamte chu:

1) Bandanna: Nghawnga scarf ang deuh han tawn/veh kual a ni. thlan hruk nan leh vaivut khu laka hmai tuam nan hman thin a ni. 

2) Chaps (shaps tiin an lam ri zawk mah):  thenkhat chuan 'chink' te pawh an ti a. Sakawr chung chuan laia a khalhtu ke rahchhan a ni. 

3) Cowboy boots: hei hi boot rawng sang a ni a, a chhip zum tak, heel sang niin, a tlangpuiin, keartui hnung lam zawnah Sakawr turna (spur) dah a ni thin. 

4) Cowboy hat: Cowboy-ho Lukhum parh khum thin kha a ni a. Ni sa tak laka inphenna a ni. Pianzia (style) tam tak a awm ve a, John B. Stetson's (Boss of the plains) an tih thin khan a tilar hle.

5) Gloves : Kutbun a ni a, a tlangpuiin, Sakhi vun atanga siam emaw, Savun lam chi hrim hrim atanga siam a ni. a nem hle a, barbed wire khawih vel pawha kut na lo tura him tha a ni. 

6) Jeans emaw, Kekawrtlawn tight : hei hi  canvas atangin emaw, denim atangin emaw an siam ber a ni.
-------------------------------------------------------

♥ COWBOY INVENTION 🔫

1) Riding boots - industrial age hun thleng khan, boot te hi mimalin an siam a. Tun hma lam cowboy boot designs, cowboy thuamte kha, Spain atanga America-a lo pem lut Vaquero-ho tradition an copy thin hle a, chu chu 16th century tir lam kha a ni.

Cowboy boot hi style bik 2-ah then a ni a: 

(a) Western (classic) boot

(b) Roper.

2) Levi Jeans : hei hi Bavarian mi, Levi Strauss (1829-1902) khan, San Francisco-ah kum 1850 khan a hmuchhuak a. Gold miner (Rangkachak khura hnathawk)-hovin kekawrtluan tlo tak an mamawh tih hriain a siam ta a ni. Hun a lo kal zel a, cowboy-hovin an lo ngaina chho ve ta hle a ni.

3) Stetson Hat : hei hi Cowboy lukhum parh a ni a, John Batterson Stetson (1830-1906) chu heti ang lukhum siamtu hi a ni a, New Jersey-a piang a ni. John B.Stetson Manufacturing Company chu Philadelphia-ah a din a. he lukhum hi thenkhat chuan, 'John B' an ti deuh kher thin.

4) Bowie Knife : heti ang chemte hi Colonel James Bowie (1798-1836) chuan a hmuchhuak niin an ngai a. hepa hi Texan Adventurer leh slave trader ni bawk a ni a, Mexican sipaite'n Alamo kulh an beih tum khan a thi ta a ni.

A nihna takah chuan, a u, Rezin Pleasant Bowie (1793-1841) zawk kha heti ang chemte hmuchhuaktu niin an ngai ve thin a ni.

5) Colt Revolver : he Pistol hi Samuel Colt (1814-1862) khan a hmuchhuak a. a tirah chuan thing nena chawhpawlha siam a ni a, a hnuah, changtlung zawkin a siamtha nawn leh ta a. American Civil War hun lai phei kha chuan an hmang nasa hle.
-------------------------------------------------------

♦ COWBOY TOOLS 🔫

1) Firearms: Pistol kan tih mai, Revolver (puakruk) an pai reng a. Rifle pawh an nei nghal bawk thin. hei hi an ranrualte chu ramsa kawlh leh misual laka an venna hmanrua a ni.

2) Knife: cowboy-ho hian pocket knife an ngaina hle thin a, folding cattle knife emaw, stock knife te an nei ran thin.

3) Lariat: Spanish tawng "la riata," tih atanga lakchhawn niin, a awmzia chu Hruihrual "the rope," tihna a ni. a chang chuan Lasso tih a ni thin.

4) Spurs: Thir atanga siam, boot keartui (heel) hnung lama dah a ni a. a vir pep pep thei a, a zum fir fer bawk. Sakawr kal tha duh lo han tur deuh aih aihna hmanrua a ni.
-------------------------------------------------------

♣ HORSE EQUIPMENT OR TACT 🔫

Sakawr thuamte hi tack tih a ni a, chungte chu:

1) Bridle: sakawr thununna tura, pawh velna tur hruihrual.

2) Martingales : Sakawr thuawih lo thunun nana pawh dakna.

3) Saddle bags (leather emaw Nylon) : can saddle chunga awm thin, thil nepnawi khungkhawmna.

4) Saddle blanket; blanket emaw pad emaw chu Sakawr hnungzang a nat loh nan Western saddle dah a ni thin.

5) Western saddle: Sakawr chung chuanna thutchhan niin, hei hi savun hmanga siam thutna seat.
-------------------------------------------------------

'Western Badman' tia an sawi thin, PHAWI RANG TURU 21-TE

1) Waytt Earp

2) Bill Longley

3) Billy Brooks

4) Wild Bill Hickok

5) Billy The Kid

6) Mysterious Dave Mather

7) Jim Courtright

8) Wes Hardin

9) Jesse 100Bill

10) Curly Bill

11) Clay Allison

12) Ben Thompson

13) Sam Bass

14) Doc Holliday

15) Joaquin Murrietta

16) King Fisher

17) Frank Leslie

18) Bat Masterson

19) Luke Short

20) John Ringo

21) Black Bart

★Thubelh: Tu'n a ka rawn sawi ang tak te khian an inthuamna te leh an khawsakdan nangmah angin in chan la, an hunlai an khawsakdan awmte chu i mitthla thiam ve ngei in ka ring..🔫



★★★



Previous
Next Post

No comments:

Thanks for your comment.