TLEIRAWL TE HNENA THURAWN




Aw Hmeltha ti a, kan suk suau suau lai kha in tan 'hman' a ni tawh a, Vai 'sipai hlau a bihru' leh 'Curfew kara lunglen' tih te chu kan pian hma daih, hman a thilthleng tawh a ni. Hun a liam zel a, generation tharah kan awm tawh avangin kan chenna in leh lo, silh leh fen leh nunphung a danglam tawh hle tih chu sawi ngai lovin kan hre theuh awm e.

“Hmanah chuan” ti a thil sawi vak vak hi nangni tleirawl te tan chuan ri bengchheng leh ninawm mai a ni a, amaherawh chu, tu thiam loh mah a ni lo. Hunin a her chhuah a ni a, kum 20 hma lam a kan khawsak phung leh tun hi chu a in lehthal chiang em bawk a ni.

Tleirawl kan tih nun hi Mihringah chuan kan nun a nawm lai ber leh kan vanglai kan hmelmawi leh duhawm lai ber a ni a, kan hringnun zinkawng kan zawh hun bultanna ti ila kan sawi sual awm love. ‘Hei hi ka nun a ni’ tih hi tunlai Tleirawl te nun a thil awm lian tak a nih avangin he thurawn hi  ngaithla ang che u. “ Hei hi ka nun a ni a, ka awm dan tur chu ka thu thu a ni” i ti maw…? Chu ti a nih chuan Tleirawl te u, Heti zawng hian han ngaihtuah ve teh le.
Silh leh fen chungchangah i duh leh mawi i tih i inbel hi tu sawisel theih mah i ni lo. I lan dan leh i incheina ah khan tumahin thu an neih ngawt nachhan tur a awm lo. I mawi leh mawiloh chu i duh dan danin i inchei thei a lawm. Thuamhnaw chhuak thar leh dangdai tak a i inchei duh a nih pawhin i thu thu a ni.   I duh dan dan in inchei rawh. Nimahsela hei hi ngaihtuah teh. 
Thuamhnaw maksak pui pui leh manto tak tak i inbel khan mi ten engtin nge an ngaih che. Mi tana zahawm taka lan nge i duh a, tu mahin engah maha an ngaih loh tur a lan chhuah i duh le. I incheina khan i chhungril nun mite hmuh theihin a tarlang a ni tih hria la,  i tleirawl duhawm lai tak a mite hmuh dan che hian i damchhung hun a hril tih hi ngaihtuah ang che.

I Hairstyle, chezia leh tawngkam pawh tu sawisel theih mah i ni lo. I nun a nih miau avangin i duh dan danin i hair style pawh i siam thei a, i duh a nih phawt chuan  sam lem leh damdawi hmang pawhin uih hmel deuh pawhin i in herh kir tir chuat thei a lawm. I duh leh i tukkhum chauh pawh sei deuhin i zuah thei a, i duh leh rawng chi hrang hrang pawhin i tial thei a, tu sawisel theih mah a ni lo. I Lu, I sam leh i hmel a nih miau avangin i ta a nia, i duh dan danin i chei thei a lawm. I tawngkam pawh i duh leh mawi takin hmang la, i duh leh chaltlai takin hmang rawh. Tunge i thusawi leh kamchhuakah thu nei thei awm. Nimahsela hei hi hria ang che. I sam avang khan hnunglam atangin an nuih chein an fak thei che a, i tawngkam khat lek avang khan mi zawng zangin an ngaihdan tur che a hril thei a sin. Damchhung hun hmang turin i puitling ve dawn chauhva, tun atanga miin i thusawi leh i hairstyle te, i chezia avang mai mai a engmah lovah an ngaih che hi hlau ang che.


Tunlai changkanna Electronic media leh lirthei changkang tak tak te hi in tana siam a ni a, in hman loh chuan tunge hmang chuang ang. A leina tur i neih phawt chuan i duh duh i lei thei a, i hmang thei a lawm. I duh chuan social media hmang pawhin,  i saruak leh zahmawh thlalak pawh pho chhuakin  i in theh thil vel thei a, movie leh film chi hrang hrang i duh duh i en thei a, tu sawisel theih mah i ni lo. Thlanrawkpa khuangchawi lai aia pui tak tak pawh en tur a tam a lawm. Internet te chu a hmangtu in a duh dan danin a hmang thei a, I duhdan a i hman kha tu sawisel theih mah i ni lo. Lirthei pawh a chhuakthar tha tak tak leh mawi tak tak pawh i khalh in i nei thei a lawm. I pawisa a i lei a nih a, Road Tax pawh i pe thlap a, i duhna hmun hmun a i leng kual a nih pawhin tu khap theih i ni hlei nem. I nun kha i ta a nia i chen a ni mai a lawm. Amaherawh chu hei hi theihnghilh lovang che.  In U te leh in pa te hi hetiang hun pal tlang vek tawh an ni a, an ni aia tleirawl lai nun chen am hi tum hauh suh ang che.  I nun kha i ta a ni a, nimahsela i tun hun avang khan i damchhungin thil chin thalo leh a tel lova awm harsa khawp hialin i awm phah thei a sin. Electronic Media leh Social Media vang mai mai a i zahawmna tur hlauh palh kha phal suh la, I nu leh pa te i u te pawhin an lo khalh hrep tawh lirthei vang mai mai a mi tana hnawksak leh phurrit siamtu nih tum hauh suh ang che. i hun hman mek khan i damchhung hun tur a hril a ni tih hria la, mi ngaih a hniam taka awm kha hlau hle ang che.

I nun ah khan tumahin sakhaw lam ngaihsak a inkhawm tur che a tilui thei tu an awm lo. I duh chuan inkhawm lovin i leng daih thei a lom. A dik a lom, Inkhawm ban lai taka Bike chak deuh a han tlan fua te hi a nuam a ni. I thiamna leh zirna atangin Pathian awm tak tak pawh i ring lova, i sawi chhe thin a nih pawhin, i thlarau nun leh inun chhungril kha i ta a ni a, tuman thu an nei hleinem. Mahse hei hi hre reng rawh. Thil engkim siamtu chu Pathian a ni. I nu chhul a i awm lai atang khan Ani hian enkawlin veng tlat lo che sela he khawvel eng hi i hmu tawp lovang. Pathian awm tak tak hi ringlovin chhut vak vak pawh nila i thih hma ngeiin Pathian hian a awm ngei a ni tih a la hriattir dawn tho tho che tih hria ang che. I hringnun i zawh dawn chauhva chuvangin a siamtu che tih a, a duh dana nun hi a tawk mai. A bak chu i puitlin ang zia zelin a la zirir ang che.

Tleirawl te u, heng hi hre reng ula, in nu leh pa te leh in u te hian tuna in hun hman mek kha an lo zawh chhuak vek tawh a ni tih hriain, i hringnun zinkawng zawh tur chu bul i tan dawn chauh a ni tih hi haider hauh suh ang che. Tuna i hun hman mek khan i puitlin hun tur a hril a, engang mi nge i la nih ve dawn tih pawh tuna i hun hman mek khan a hril dawn a ni. Kan Pathian pawh hian kan vanglai hun kan chen a phal a, nimahsela kan pang tina tu awm lo turin min duh a ni. Tleirawl lai hun hman dan thiam tur a chhia leh tha hriatna nei i ni a, ‘I Nun kha i ta a ni’ Kha i nun ngei kha i hmalam hun a i nih tur ang kawng zawh tura bultan mek a ni a, ngaihtuahna fim tak hmang chungin i damchhung ni chhiar ang che.
Previous
Next Post

No comments:

Thanks for your comment.