AIDS KA VEI VE PHAH A!

('AIDS KA VEI VE A!' tih phêk lehlam, kum-18 tling lo tân chhiar khap bur a ni!)

©IG

 - Jave Lalramnghaka 

AIDS vei pathlawi, fapa pakhat nei tawh leh nghâl chu ka ngaizâwng ang tih ka inring phâk ngai lo a, amâ țawngkam takin 'HMANGAIHNA HI ÂTNA CHI KHAT A NI' ka han ti ve tawp tawh mai ang e..

Mi rethei leh harsa ve tak mai kan nia, ka pain kum 2005 khân chatuan ram min pansan a, ka nu leh ka nâu pahnih nên, mî in luahin kan khawsa ve nâw nâw a, kan awmna vêng chu ka sawi rih lo mai ang. Mi zawng zawng kawmthlang tiin a ni mai. Ka nu nên puan țhuiin ei kan zawng țhîn a.

Tlâi khat chu ka nâu nên tui kan châwi dûn a, ka nâu ka nghah mêk lai chuan mipa pakhat hian, "Bawihi, puih i ngai em ni?" a rawn ti ringawt a. Ka nuih pawh a za lêm lo. A zak thei lo ka ti deuh tlat a nih chu.

"I Bawihi chu ka ni lo ang aw!" ka han ti deuh țhak a, "A nih chuan - Matei a ni mai a niang chu," tiin min chhâng nghâl a. Ka nuih a za deuh. Ka nu leh pain min koh dân chiah chiah a nia.

"Min lo chhipchhuantîr rawh," ka han tih chuan a nui vur vur a, min rawn pui nghâl ve mai bawk a.

"Min tirh duh avângin ka lâwm e," a rawn ti hrâm a. Mahnia tui țin khat han inhlan chu a harsa deuh țhîn a, a rûk tê chuan ka lâwm angreng. Min rawn puih zawh chuan, "Ka lâwm e," ka han ti khawmawi ve bawk a..

"I lâwm avângin ka lâwm e," tia min chhân pah chuan min rawn melh kar a, a ding reng a, ka lài ve det a nih kha.

Amah chu pa tê lampang, thâu ve angreng hi a ni a, a hmêl chu ka ngei zâwng tak a ni. A țawng theih hmêl angreng sia. Eng dang sawi lo chuan kan in lam panin ka chho nghâl a, ka hnungah chuan a rawn kal ve zêl a. A tâwpah phei chuan ka thinin a tuar thlâwt lo a..

"Ka pu, duh i nei em'i? Tinge min rawn zui zêl a?" ka ti tawp a. Ka han inngaihtuah chian chuan ka inthiam lo deuh hlek. Mahse, a țawng thei bawk sia, a ngeiawm ve hrim hrim alâwm.

"Pathlawi fapa pakhat nei tawh ka ni nâa, tlangvâlah ka inruat rih. Min pû lo la ka lâwm ang. Chuan, nangmah duh thut ta che ila engtin nge niang?" a ti a, a nui ri kur kur a. "I chhe mai a!" ti bâkin ka chhâng peih lo.

"Nangmah i țhaa, a tâwk. I pawi ka sawi a nih chuan min ngaidam la, tihpalh - tin, ka hâwnna tûr kalkawngah ka kal ve mêk a ni e," a han tih chuan ka inthiam lo leh hnuhnawh a..

"Ka pu, thingpui sen hâng i duh em?" țawngkam mawiin ka han ti a, "Ngai lo e. I zahawm êm mai," tiin min chhâng a. Miin zahawm min tih ka hre ngai lo. Ka ding lawk a, ka han lehhawi zauh a, a hmêl chu a hmâ ang a lo ni miah lo mai. Ka khawngaih tlat. A kiut ka ti.

Ui kan han hâu a, inthiam lo deuh hmêl pûin an ngui ruai țhîn a; chuti ang hmêl deuh chu a lo pu tawh a, ka khawngaih reuh lutuk. Zawhtê erawh hi chu an mâwl ka ti tlat, hauh an hre ve vak lo a.

"Chini kan nei rih lo nâa, a sen hâng i duh chuan ka lo lumsak ang che," ka han ti mauh mai chu'h, a lâwm ve ngang a niang. A aw a thian karh karh a, a khuh kharh kharh a, "I ti tak tak em ni? Ka lâwm e. Mahse, nî dangah ni mai rawh se aw?" a ti ta daih a..

Miin khawngaih avângin kan sâwm ve hrâm hrâm a, "Ti tak tak lo ila ka sâwm dâwn che em ni? Duh leh rawn in tawp suh!" ka ti liam leh ta phut a nih chu! Thinchhiat hi ka ning. Sim a harsa si. Tlêma han hah deuh hi chuan thin hi a chhe hmâ lutuk a, insiam țhat ka ngai tak zet.

"Min haw lo la, i duhawm reuh ka ti. I rilru a thianghlìm ka ring tlat. Thingpui rawn in chu i la phal mial em?" a han tih chuan a rûkin ka lâwm veng veng. Hmeichhia hi chuan duhawm nih kan duh a, rilru thianghlim pû nih kan duh fo bawkin ka hria. Lungawi takin kan inzui chho nak nak thei ta hrâm a nih kha.

Kawng lakah chuan ka nâu kan tâwk chhova, "U, rawn chhuk leh vat rawh aw? Ka lo nghâk ang che," tiin min chah nghâl a.

Chû pathlawi chu a inher thut a, "Mate, thingpui sen hâng chu lo han lum la, i nâu nên kan rawn chho ang e," tih pah chuan ka nâu chu a zui nghâl a, a mizia chu a mak ka ti angreng. Ka rin aiin a fel, "Matei maw ka nih dâwn a? Haha! Ka nûin chini leina tûr pawisa a neih chuan a thlumin kan lum dâwn nia," ka ti ve ta a nih kha. A nui a, ka nui ve bawk a, ka nâu nên chuan tuikhur lam pan chuan an chhukthla hnak hnak a.

A hnûa ka hriat leh dân chuan, ka chanchin eng eng emaw chu ka nâu a lo zâwt chiam a ni âwm e..

Chini Kg.1 ka lei a, thingpui chu lumsain ka dah dîm diâm a. A hnû lawkah chuan ka nâu leh ka țhian chhàr thar chu an rawn haw ve thuai mai bawk a. Tukverh ațang chuan ka thlîr reng a, pathlawi pa chuan țîn chu a chhîpchhuan a, kawr huh vekin a rawn thleng a, a rûkin ka nui char char a. Chuan, chu mi nî chuan hming hriat loh pa chu thingpui ka lumsak ve ringawt a nih chu - a mak ka ti ngei..

An rawn thlen hnû chuan ka nu nên an titi char char a, min be ve mang lo. "Mate, i țhianpa nên hian thingpui thlum chu kan lo in ang e," tia ka nûin min hrilh hnû chuan thingpui chu ka va pe a; chu pa chu, "Mate, ka lâwm e," tih pah chuan a nui vur vur a, ka nui chhuak ngam lo nâa, ka nuih a za angreng. Choka lama phei pahin ka nui char char a.

"Matei nên hian engtin nge in inhriat rêng rêng a?" tia ka nûin a zawh lai chuan ka ngawi reng a, "Matei Nu, englo a nia, a rei tawh mai. Puih a ngai a, ka pui a, chuta țang chuan kan inkâwm chho a, hmân lai thil maw le," a tih chuan a rûkin ka nui lehpek a, a 'funny' reuh lutuk!

Rei fê an titi leh hnû chuan, "Matei te unâu hian ka khua a har ang tih an hlâu a, pasal nei leh tûrin min tur ngat ngat țhîn a, kan innei mai dâwn em niang?" tih pah chuan ka nu chuan a kheuh ru zeuh lâi chu ka va hmû a, "Nu, Pathâuva kha min chuhpui chuan chhûngkua kan keh darh a ni mai," ka va ti fiam ve bawrh bawrh a, an titi ngaihthlâk a nuam a nia aw; fiamthû an duh dûn bawk sia, nawi tak an ni, nawi tak!

Mathematics avângin kum thum chhûng chu Class-12 ka bei nawn a, ka beidawn hnû chuan ka nu hian pasal nei mai tûrin min hrilh țhîn a. Mahse, nâu pahnih ka neih avângin chhûngkua ka ngaihtuah a, ngaihzâwng pawh ka ngaihsak ngai lêm hlei lo a.

"Pathlawì, ka nu kha i fapa kum zât hrilh rawh," ka va ti thut a, "A hriat duh te chuan amân ka fapa chu zâwt mai sela a ni mai alâwm," tiin min chhâng daih a, ka nui lehpek a.

"Pathlawi maw i nih a? Tinge i fapa nu nên chuan in ințhen a?" tiin ka nu chuan a zâwt hmiah ta mai a, "Matei Nu, hmangaihna hi âtna chi khat a nia, ka â êm a, mâkpa chhûngkhung tein ka va lût ang lâwp lâwp ve tak nâa, ka hmangaihna chuan a mi hmangaihna kha a hnawt bo zo a ni ang e. A tâwpah chuan mi dang min kawpsan a, chuti chung pawh chuan ka țhen phal chuang lo nâa, amân min țhen ta a nih kha," tiin ka nu chu rilru nawm loh hmêl tak pu chungin a chhâng a, ka khawngaih reuh tak tak a nia aw.

"A nih chu maw le, a van zia lo ve aw, Matei hi nei mai rawh," nui sun sun pah chuan a ti thut a, "A teuh lo mai! Pathlawi ka duh lo. Chuan, chuan, chuan, ka bialpa ka hnektîr hrep a ni mai!" ka ti nghâl vat a. Ka nu chu ka va melh rum khur khur a.

Pathlawia leh ka nu chu za mangkheng hian an nui dûn char char a, kei chu ka nuih a za ve hauh lo. Ka nu pawh hi fiamthû a duh mah mah țhîn a, a châng chuan ka haw tawp țhîn. Ka tih ngaihna hre lo, thinrim bawk si chu, "Nangni pahnih kha; ni r'u, ni r'u!" ka va ti a, a aia nasa leh zualin an nui a, ka ngei ve ve tak tak a nia aw..

"Matei Nu, Matei bialpa chu a sek viau em? Ka cho ve mai ang em?" tiin ka nu chu a han zâwt nghâl vat a, ka nû chu ka va melh hrâwk a, ka va țhenkhum vak a, "Amah saw zâwt la ti nia," a tih chuan ka lâwm khawp mai. Bialpa ka nei emaw ti sela ka duh a, chuti lo chuan min zuam ang tih ka hlâu a ni.

Engmah sawi lo chuan pâwnah ka chhuahsan a, țhenawm te inah ka lêng daih a.

An titi laia ka nu hmêl hlimzia chu ka mitthlâah a châm reng a, khati anga hlim hmêlpu khân ka pa thih hnûah ka nu hmêl ka hmu ngai mang lo. Ka nâu te pawh kil khatah an titi ngâithlain an lo nui ve ver ver reng kha a nia. Ka thinrim chu a reh thuai a. Ina ka va haw leh chuan..

"Mate, inlêng neih laiin an kal bosan ngai lo asin, i ti ang lo êm mai, chîng tawh suh ang che," tiin ka nu chuan min zilh nghâl a. "A dawheh ve hrim hrim, nu - tuichawina lamah kan intawng a, nichin deuh lawk khân. A țawng peih si, ka ei thlâwt lo. Duh leh thi daih sela, ho ê," ka han ti ve bawk a.

"Chutin țawng mai mai suh, a malsâwm lo. Piansual leh vânduaina te hian thlei bîk a nei hauh lo a nia, țhian țha tak pawh in la ni thei asin," a tih hnû chuan ka ngawi reng a, tlâi lam a lo ni zual deuh deuh a, zanriah ei khamah chuan TV kan enho mai mai a.

Ka nu biakbûr chu a rawn ri ral ral a, a lâk hnû chuan, "Mate, kha, i țhianpa," tih pah chuan min rawn hlân chhâwng a. "Matei maw? Pathlawia kha ka nia. Tlâiah khân țhutthlêng hnuaia rawmawl ka dah ka theihnghilh daih mai a, rawn lam a rem ang em?" a rawn ti a.

Ka nu va melh kâwk pah chuan, "I thu thu alâwm," ti ringawtin ka chhâng a. Lâwmthû a sawi zauh hnû chuan 'phone' chu a dah ta a. "Nu, nambar te in lo inpe hman elo?" ka han ti a, "Min dîl nasa êm a, pêk loh chi pawh a ni lo. Rawn lên a tum em ni? A rawn lên chuan i thinchhe zia kha thup tum ang che," min han ti a.

Darkâr khat hnû vêlah chuan kan Pathlawia chu a rawn lang a, ka nu nên bawk chuan an titi leh mial mial a. Kei erawh chuan ka nu biakbûr hmangin hmêlbu/FB ka khawih mai mai a. Ka nâu te chuan TV an en a. Mahni tlei tleiin kan tlei vek a, a țha phian. Thingpui te ka lumsak a, min biak ve pawhin a rûl tâwk tein ka chhâng mai țhîn a. A hur hmêl sia, ka ei vak lo atin ni!

Dâr 10 rîk dâwnah ka nu chuan, "Mate, i țhianpa hi va thlah rawh," a rawn ti a. Chhân pawh chhâng lo chuan ka tho vut a, kawngkhâr bulah chuan ka ding reng a. "A nih, ka kal mai ang e. Matein rem a tih leh kan la titi leh țhîn dâwn nia," tiin ka nû a hrilh hnû chuan pâwnah kan inzui chhuak nghâl a.

"Mate, i pawi ka sawi a nih chuan min ngaidam la. Min be peih vak lo tiraw?" a han tih chuan ka thinin a tuar lo leh ta pek a, "Peih lo, peih lo. I lerh hmêl êm alâwm," ka ti siah siah a. Ani lah chu a nui kiah kiah a, "He lai thleng hi ni mai rawh se, i bialpa chu min lo cho dâwn nia," a ti a. Eng dang sawi lovin kan in lam panin ka kalsan hmak ta a ni.

Chu mi zânah chuan engin nge min mawlh pawh ka hre lo, kan Pathlawia ringawt chu rilrûah a awm reng a. Muthilh ka han tum pawhin ka muhil thei dêr lo. Ka nu a kawm hlimzia te, ka nâu te a fiam peihzia te, min biak ve a tum tlatzia te ka ngaihtuah neuh neuh a. Ka nû zawhna khirh tak a chhân laia a hmêl ngui ruai te kha ka mitthlâah a châm reng a, ka khawngaih reuh khawp mai. A rilru ti na bîk tawh lo tûrin rilru ka siam fel ta a ni.
© IG
Chutia rilru ka siam fel hnû chuan a reh ta daih a; nî a liam a, kâr a vei a, thlâ dâwn a ral hnû chuan zan khat chu ka nu muthilh laiin a biakbûr chu a rawn ri tleng tleng a, ka han en chuan 'Bawiha Matei' tih ațangin 'call' a dawng hi a lo nia. Mak ti angreng tak chung chuan ka han la a, "Hello? Ka nu a mu tawh a. Tunge aw?" ka han ti a.

"Matei elo?" a han tih chuan, "Aw, tunge a?" ka ti ve leh a. "Pathlawia kha ka nia, min la hria em? Rawmawl theihnghilh luitu kha? I bialpa chu min lo cho ta em?" a han tih chuan ka lâwm ru veng veng a, a chhan pawh ka hre bîk chiah lo - ka lâwm ve tawp ta'ni..

"Bawih, i van reh ve?" ka han ti hmiah a. Ka nu pawhin Bawiha ti ngatin a hming a chhinchhiah alâwm le, ho ê!

"Eng a? Engtin maw? Han sawi țha leh lawk teh, khawngaihin?" a rawn ti chiam a. Awih harsa a ti ve deuh a niang, ka ngawi reng a, "Mate, i la awm em? Hello? Hello?" a ti zêl a, ka zak ve deuh.

"I ninawm! Awm e, awm e! I duh chu sawi la? Eng nge ni ta? Mawlh mawlh che chuan," tiin ka han âng leh piap piap a. Ka thin a rim pawh a ni lo, zahzêlan ka han țawng deuh buan buan mai mai chauh a ni.

"À, englo a nia. Inbiak a khât êm a, chanchin te ka rawn hre duh mai mai maw le. In dam tlâng maw? Min lo hre thiam lawk la. Nichin khân 'Bawih' min rawn tiin ka hria a, ka beng chhe ri emaw ni zâwk. Kha kha eng nge a awmzia?" a tih lai chuan ka nui char char a. Nui ri lo tûrin ka insûm hrâm hrâm a. Ka chhaih châk tlat a nih chu!

"Bawih, 'Bawih' tia koh che a rem em?" ka han ti ta deuh deuh a, a rilru a buai ve hlek a niang. A karei ri țhawt rî chu ka hre phâk a, "Mate, i rûi elo?" a rawn ti ta mai a. Ka thin chu a alh phat nghâl a, ka tâwt up up a, ka rilrû chuan '1, 2, 3, 4, 5, 6, 7, 8, 8, 8, 9, 9' tia ka chhiar chhoh lai namêk chuan..

"Khawngaihna thinlung i nei ve ngai a nih chuan, khawngaih takin min ngaidam hrâm hrâm ang che. Kan duh tâwk rih mai dâwn em niang, Mate?" tih țawngkam chuan min chhêm dâi sawng sawng a. Ka thinlung hian khawngaihna chu a nei ve bawkin ka hria alâwm.

"Bawih, ka zawhna min la chhâng lo a nia aw," ka ti leh thei ta a ni.

A reh deuh vang vang a, mangang aw rî ang deuh lek lek hian, "Mate, ka van zak teuh deuh ve maw le. Ka zak ngai lêm lo asin maw le. Eng vângin nge 'Bawih' tia min koh i duh a? Min han hrilh fiah mai teh à? Pathlawia hi ka buai a ni e," a rawn ti lehpek a.

"I ho e a! Kan inhmuh hmasak ber nî khân tunge 'Bawihi' tih leh 'Mate' tia min ko nghâltu kha? I theihnghilh tawh em ni, Bawih? A thu hrimin, 'Bawih' tia koh pawh chu i van duh lo âwm ve a? Mawh a?" ka han ti deuh pâng pâng a, a rûkin ka nui char char thung a.

"E khai à! A van mak dâwn ve maw le, a van mak dâwn ve maw le," a tih lai chuan ka rilru a hnîm deuh ruih a, awih harsa a ti tak zet a ni. Ka chhaih mai mai tak nâa, ka khawngaih țan tlat. Awih harsa a ti lutuk chu ka rilru a na ve ta hial a, a mak duh angreng.

"Mate, i bialpa nên in lo ințhen hman em ni? Eng pawh chu ni sela, fiamthû i thawh pawh ni fahmiang. Hei chauh hi ka zâwt ngam a che - hmangaih che a rem em?" tiin a țawng chhuak ta nghe nghe a. A tir ațanga ka rin lâwk dân chiah chu a nia. Mahse maw, khawngaihna nge hmangaihna hi hlu zâwk ang le? Rilrûah chuan pathlawi fa pakhat nei tawh a nihna a lang lian ber a..

"Rem e. Mahse, hmangaih lêt che a rem lo a nih pawhin min dem suh ang che. Kei chuan țhian anga kawm che ka duh a," tiin ka chhâng hmiah a. Thil zêp sî sê hi ka peih ve vak lo. Nihna ang ang hian lang ngam ila, huaisen a awlsam berin ka hria. Thurûk ngah lutuk te hian nun a ti ngampa lo a, 'frank' taka awm hi ka mizia nên a inhmeh bera ka hriat tlat avângin dâwt ka sawi duh ngai lo a ni. Mi dang rilru tih nat erawh a awl a, ka nûin min zilh nasatna ber thil pawh a nia.

"Ka lâwm êm êm e. A nih, mangțha muttui phawt le," a ti a, a 'cellphone' chu a dah nghâl hmak a. Hmn hmh!

"In sawi zo thei maw?" a rawn ti thut a, lei chhuah tut pah chuan ka phu zawk a. Ka nu hnênah chuan kan inbiak dân zawng zawng chu ka hrilh a.

"Mate, hmangaihna hi chu tawn fiah chi a nia, sawia fiah thei thil pawh a ni lo. Mi dum leh mi vâr a thliar lo a, mi hausa leh mi rethei a thliar chuang lo a, dam leh damlo lakah pawh a thiltihtheihna a ngai reng țhîn. Bawiha hi i duh thei dâwn lo a nih chuan be tawh lo law law ang che," tiin min hrilh mial mial a.

"Nu, tinge i 'phone'-ah 'Bawiha Matei' tiin a nambar i SAVE kher kher a?" tiin ka han zâwt a. Ka nû min chhânna chuan ka mittui a ko chhuak hial a..

"A hmêl ka hmuh hian i pâ hlimthlâ ka hmu tel tlat a; mize ngainatawm leh nêlawm tak a pû a, fiamthû a duh phian a, phungthlûka hawihhâwm rûkna riau a nei roh pek a, mi pangngai tak a niin ka hria. I pa kha la dam sela chuan an inkâwm ngeih viauvin ka ring. An inmil  viau mai thei asin. I pa kha pasal in neih thlengin dam sela, tû te pawh han hmu ve hman sela a țha tûr a nia. A pawi ngawt mai, Mate, a pawi a ni. I pa kha chu.."

A mittui luang ka hmuh vêleh a sawi zawm zêl hmâ chuan ka kuah nghâl a, kan nufa chuan kan țap a, "Nu, khati khân ti ziah tawh teh suh. A hrehawm țhîn a nia. Nâupang an harh ang e. Pasal nei leh vat mai teh, i hrisêl loh êm hi. I lunglênna pawh a ziaawm mai ang," tiin thlamuan ka han tum ve bawk chu a nia. Ka pa chanchin sawipui zêl ai chuan tiin Pathlawia chungchâng ka sawipui jeih a, kan titi luam hnû chuan mut zâi kan rêl ta a ni.

"Mate, min hmangaih ve thei lo em ni? Hmangaih i tawng tawh a nih pawhin, a khing phel tal chu ka tân zuahin a awm ve thei mai lo em ni? Hmangaih ber neih theih sî loh chuan ka tân nun hi eng nge a sâwtna ni a, dam hi eng nge a hlutna? Ka liam mai dâwn e, ka liam mai dâwn e. Pialrâl kawt chhuahah ka lo hmuak ang che. Dam chhûng atân mangțha mai le. Thih hnû atân erawh hmangaihna chibai ka bûk nghâl a che. Lo haw ta che, ka lo nghâk reng ang che,"  tiin min lo kalsan mêk a...

"Bawih, Bawih, Bawih!" tiin ka au lawm lawm a, ani chuan min hlatsan tial tial a. A aia nasa lehzual chuan ka âu tuar tuar a, ka țap chhuak ta hial a..

"Mami, Mamte, harh teh! Harh teh!" tiin ka nu chuan min lo sawi nawk nawk a. Ka han harh chuan ka biangah mittui a lo luang nasa mai chu a lo nia.

"Tunge 'Bawih' tia i koh chiam chiama chu? Mate, i mumangah Pathlawia i hmu a ni maw?" tiin a nui chhuak phawng a, "Nu, i ho teh tuh em mai a'h! Mu teh, mu teh," ka han ti ve tak nâa, a nui ring zual sauh a. A hma lawka țap dûn fep fep kha, kan han nui dûn leh bãwk bãwk chu a nia, zân dangdâi tak chu a ni ngei mai.

A tûkah chuan rawngbâwl laiin hmêlbu lamah ka han lût a, 'friend request' pakhat hi ka lo dawng a. Ka han en chian chuan kan Pathlawia bawk chu a lo nia, mak ti angrenga ka 'confirm' zawh hnû chuan 'inbox' ka en vat a..

"Mate, i nâu hnênah i 'profile name' hi ka zâwt tawh a, tuikhur lamah khân. Min lo 'confirm' ngei pawh ka beisei. Tin, i pa thlalâk ka hmu duh a, min lo thawn vat thei la ka lâwm êm êm ang. A pawimawh tak zet. He thuziak hi i hmuh hun hunah i pa thlalâk chu min rawn thawn nghâl dâwn nia," tiin thû min lo chah hi a lo nia.

Ka pa thlalâk ber kher, tinge le? Mak ti angreng tak chung chuan ka pa thlalâk chu ka han zawng kual thiak thuak a, a dam laia kan vawk vulh bula thlâ ka lâksak ngei mai chu thlâ ka han la a, fiah vak lo chung chuan ka han thawn nghâl ve mai bawk a. Nilêngin ka nu nên puan kan țhui a, kan Pathlawia ringawt chu rilrûah a châm reng a, ka pâ thlalâk ber kher, tinge le? Kan inhre țan ve chauh a, mumangah ka hmu nghâl mai bawk sia, mak chu ka ti ve reng.

"Mate, i nâu te sikul rawn bâng sela, bazâr lamah i 'phone' tûr va en ang che u. I Bawiha nên hian in ninawm țan riau," a rawn ti thut a. Ka țe chhuak țhawt a, ka âu vak vak a, ka nu chu ka kuah nawk nawk a. Tlâi lamah chuan NOKAI thar kan va lei a, 'simcard' nungsa lei nghâlin, ka biak hmasak ber chu ka han be chhin a..

"Hello? Tunge aw?" tiin ka Bawiha chuan min rawn chhâng nghâl thuai a. "Maliani ka nia, min la hria em? I dî hlui teho han ngaihtuah lêt chhin teh," ka han tih chuan a nui kiah kiah a, "Ka Duhtaki aw ngei mai chu a ni sia, tu 'phone' nge i hman a? Ve teh mial che chuan, eng nge ni ta?" a rawn ti a.

"Tunge i Duhtaki chu?" nui ver ver chung chuan ka han ti zêl a. "Mate, fiamthû lovin. Eng nge ni ta? Thil pawimawh tak hrilh tûr che ka nei. I pa thlalâk chu min rawn thawn ta em?" a han ti a.

Rei kan inbe hman lo. Lo lamah a feh a, an buai deuh thû min hrilh a. Zâna rawn lên a tum thû min hrilh hnû chuan a vawi khat nân 'muah' tih pahin ka biakbûr thar chu ka fâwp zeuh a, ka dah nghâl hmak a. Ka han ngaihtuah chiang a, ka zak det! Mahse, thinlungin ti tûra min hrilh ti ngam ngai lo tûra mi dawihzep nih ve ka tum hauh lo thung. Duh leh zak thei lo min ti țhîn mah sela, mahni rilru a thawven chuan a tâwk viau a ni - IT'S MY HEART!

Zanriah ei khamah chuan ka nâu te nên kan che sawk sawk a, rei lo têah kan zo thuai a. Ka biakbûr thar ațang chuan hmêlbu lamah ka han lût a, ka Bawiha a 'online' loh avângin rei ka khawih peih lo. TV ka en ve a, rilrûah a lût thei thlâwt lo a. Mawng vawm bâ an sawi ang maiin ka phî chung a, ka Pathâuva hmuh hlân ka nghâkhlel êm atin ni!

Ka biakbûr thar chu a rawn ri tleng tleng a, ka han chhân chuan, "Mate, vawiin chu ka hah deuh a. Naktûkah inhmuh tum zâwk mai ila? Pawi em?" a rawn ti ta mai a. Ka thin chuan a tuar lo lehpek a, ka ngei lutuk chu ka puak dâwnin ka hria..

"I duh leh rawn lêng tawp suh. Biak pawh min rawn be tawh suh!" ka ti a, ka biakbûr chu ka hmet tâwp hmak a. Dik tak chuan fa pakhat nei leh nghâl, kan hmu châk chu lâwm êm êm tûr hi a niin ka hria.

"Bawihi, insûm ve deuh țhîn teh. I thinchhe mah mah țhîn," tia ka nûin min rawn kamkhat chuàn ka thinrim a ti zual sauh sauh a, inhnuai lamah ka tlânthla nghâl a; âr kan vulh te pawh chuan min en hrek hrek hian ka hre vek a, ka khâwng luhai vek châk lutuk. Kan vawkpui vulh lah chu a rawn ngûk ang hluah hluah a, thingkhawna mi thingfâk pakhat chu lâk lawka hlap pawp pawp ka châk zek zek a ni. Nge? Mî thinrim ve mai mai te!

Pathlawia thil hrilh duh ka neih vâng vek. Ani pawhin thil min hrilh tûr a neih thû kha beng za tâwk lekin min hrilh a, thinlung a ti vir zo vekin ka hria. Ka huaisenna zawng zawng sâwm khâwmin ka mumang ka hrilh ang te ka lo tia, ka ngei lutuk ringawt. Ka țah te a chhuak hial a, chutia ka indawm kun bûr lai namêk chuan inchung lamah thâwm ka hre ta a, ka rilru a dam sawng sawng a.

"Khaw'nge amah chu a awm a?" tia ka Bawiha zawhna ri ka hre phâk a, "A tihtauh hi chuan inhnuai lamah bâk a kal ngai lo," tiin ka nâuvin a chhâng a, a rawn chhukthla ri chu ka hre nghâl mai bawk a. A rawn thlen chuan en pawh ka en peih lo, ka ngei rih tlat. Ka bulah chuan a rawn țhu a, ka țawng chhuak lo a, ani pawh chu ngâwi rengin a țhu hlê hlê a. Min rawn țhut hnaih zauh pah chuan..

"Mate, englo a ni. Nizân chu ka mumangah pa pakhat ka hmu a, puan vâr tak sinin ka hmu a, angel emaw ka ti hial a. 'Ka fanu tân thih thlenga i rinawm thei dâwn lo a nih chuan hnaih tawh lo law law tûrin ka ngên chiam a che,' tiin min hrilh a. Boruakah chuan a ral nghâl a. Ka hlâu êm êm a, ka harh hlawl a. Hmêlbu/FB kal tlanga i pa thlalâk kha ka lo hmu a, ka mumanga ka hmuh ngei chu a lo ni bawk nên, ka rawn lêng ngam lo alâwm le. Mahse hei, hlâu chung chungin ka rawn kal tawp mai a nih hi," tia min hrilh pah chuan ka kut a rawn vuan chawt a.

"Bawih, nizân khân tinge min kalsan i tum țalh a?" ka han ti a. Mak ti hmêl takin, "Khawi ațang maw?" a tih chuan ka nuih a za tlat pek a, a kut chu ka hûm nghet ve sauh sauh a.

"Bawih, ka mumangah ka hmu che alâwm. Min kalsan i lo tum a, ka àu lawm lawm che a, min hre duh lovin i kal lui zêl a. Ka țap vak vak a, ka nûin min rawn sawi harh chuan ka mittui a lo tla phung alâwm. Tinge min kalsan i tum kher kher a, insawi fiah teh, mawh?" ka han ti a. A mit ka han en chuan sawi tûr hre lova dàng mitmeng ka hmuin ka hria. A ngawih vang vang hnû chuan ka kut dinglam chu a kut pahnih chuan a rawn vuan a.

"Mate, i mumang chu a dik a ni. Keini pahnih hi kan inhmangaih tak tak hmâ hian inbe tawh lo ila ka lo ti rilru deuh a. Pathlawi fa nei tawh ka nia, nang erawh chu nula thianghlim i ni sia, ka phû lo che a ni, ka phû ngang lo che a ni," a ti a. Ka thin a rim dâwn emaw ka ti a, ka thinlung a na zâwkin ka hria.

"Hmangaih tawh ta sî che ila min kalsan i tum tho ang em? Chuan, min phû lo mah la keiman ka phû tho che a, a tâwk mai lo maw? Mawh a?" tia zawhna ka han zawh chuan a thaw hak a, ka kut a vawn lâi chu thlahin a kut khinghnih chuan a tukhum chu a dawm a, hnuai lam a a bih nghâl a.

"Bawih, fanghmîr i zawng em ni?" ka han ti nghâl zat a. A nui a, a nui lehpek țhîn a. A nui ri chuan ka thinlungah lâwmna a rawn tuh ve thuai a. Kan pahnih chuan tlei takin kan nui a. Ka nu chuan, "Nangni pahnih kha, thâwm dîm deuh r'u," a rawn tih lâi chuan inthiam lo takin lei a rawn chhuah tut a, ka nuih a za lehzual a. Hun hlimawm tak kan hmangin ka hria.

"Mate, i ti sual lovang maw? Pathlawi hi i hmangaih duh ang maw?" a han ti chuan ka thin a khei zeuh a, "Ka hmangaih duh che. Mahse, hmangaihna awmzia ka la hre lo a nia aw," ka han tihsak a. A insûm a ni tih hriat rêng rêng hian a hmui chu a hup a, a khûr det det a, hmuh a nuam ka ti khawp mai, ve ngei an'a!

"A nih chuan Mate, kuah che a rem em?" a rawn ti lehpek a. Min hlâu lutuk chu ka thin a ur leh ta tlat pek a, "Bawih, lo hnâi teh," tia kut khinghniha a nghâwnga kuah nghâl pah chuan ka han fâwp hmasa ta mai a nih kha. A hmui chu a rualin ka hmuamsak a, ka hmuam thui deuh a niang chu, tuisik hâk ni âwm fahran hian a rawn phuh țhawt a, ka biang a puar nghâl pawp a, infâwp zawm ta lêm lo chuan kan han nui dûn leh rih a.

"Mate, i va han zei lo tak e aw!" tih pah chuan a nui ri kur kur a..

"Bawih, mipa vawi khat ka fawh vêna a nih kha. Lâwm hlê rawh," ka han ti chu a lâwm ngang a niang chu; a kûn lawk a, ka mal pahnih chu a rawn hmer a, min châwi kâng lawp a, min virpui chiai chiai ta mai a. Ka rilru tê tê chuan a 'kuch kuch hota hai' ka ti riau a, a vâi țingțang ka ti deuh bawk. Mahse, a hlim êm a, ka hlim ve bawk a ni.

Țhâwk leh khatan kan ri chawrh a, a mal chung ațang chuan ka tho nghâl a. Ani chu leiah chuan a țhu reng a, "Lawks aw, lawks aw - something something!" tih pah chuan a kut khinghnihin a tilte fûnna bâwr chu a dawm vawng vawng a, ka nuih a za leh ta tlat pek a.

Hmun danga hawi sawn pah chuan, "Bawih, han bih chiang deuh teh. A tliak em? A la hman tlâk ang em?" ka han ti hrâm a. Lungsi takin ka nui dûn leh bawk a.

Ni tin deuh thàw kan inbia a, thla thum vêl a vei meuh chuan a âw hre lovin ka awm hleithei lo a, keimah zâwk hian ka ti buai ang tih ka hlâu hial țhîn. Mi dang a bia ang tih hlauhnain ka khat fo a, a chhan chu pathlawiho hi chu hmeichhe țhenkhat hian kan zuam tlat țhîn.

Zan khat chu ka nuin, "Mamte, Pathlawia hmangaihna hi eng chena thûk nge i hre duh em? Finfiaha en chhin i ngam em?" tiin min zâwt a. Ka hriat duh thû leh finfiah ka ngam thû ka hrilh hnû chuan thang kam dân tûr kan sawi dûn ta a. Kan thil rêl chu a hâutak dâwn khawp mai. Kan rêl zawh chuan, "Thil pakhat chiah ka chah ang che - insûm tlat ang che, insûm tlat ang che!" tiin ka nu chuan min hrilh mawlh mawlh a.

A tûkah chuan kan rêl ang ngeiin ka nâu te sikul kal tûra an chhuah ve ve hnû chuan ka nu chu ka putea te inah ka biak leh hmâ chu va lêng tûrin a chhuak thuai a. Ka biakbûr hmang chuan ka Bawiha chu ka va be ta a, "Bawih, ka lû a hai deuh a. Ka nâu te sikul an rawn bâng tlâi dâwn bawk sia, ka nu lah a chhuak nilêng dâwn bawk a, vawiin chu min lo awmpui mai teh a? Mawh? Khawngaihin?" ka han ti a.

"A van zia lo ve aw. Buh ka hertîr zawh vêleh vaitamin kengin ka rawn kal dâwn nia," a tih zawh chuan eng eng emaw kan sawi a, inbiak chu kan ti tâwp a.

Rei rial lovin a rawn thleng thuai a. Ei tûr leh vaitamin eng eng emaw a rawn keng nghe nghe a. Inbual ka duh thû ka hrilh hnû chuan pindan lamah ka luhsan a. Ka nu nêna kan rêl ang ngeiin ka inphelh sawk sawk a, kekawrtê leh bra nên chauhva ka awm hnû chuan..

"Bawih, rawn lût ve lawk mai teh. Hei, ka bra hi ka phelh thei lo a nia. A kilhna hi rawn phelh lawk teh," ka han ti a. A rawn lût a, ka bra inkilhna a phelh zawh chuan ka inher thut a, bra chu chhuatah chuan ka thlauh nghâl a. "E khai a!" tih pah chuan a 'back' deuh dâwrh a, a nghâwngah va beiin ka kuah nghâl vat a.

"Mate, eng nge a awmzia?" a han ti a. Ka hnutê te chuan a kawr hâk chu an si zauh zauh a, ka za chuai chuai a. "SEX min hmanpui loh chuan min hmangaih ve lo tihna a niang," tiin ka chhâng a. Rei tak kan ngawi reng a. Kan thaw dêp dêp a, kan thinphû te chu a inchhâwk dap dap ni berin ka hria.

"Mate, sex hi hmangaih lantîrna sâng ber a ni lo asin, ngaihtuah chiang leh deuh teh," tia ka beng bula min hrilh pah chuan a thaw halh halh a. Ka awm dân pangngai aiin ka danglam zo a, ani pawh a awm dân a khawlo ve deuhvin ka hria.

"Bawih, ui pawhin a awmna hmun bâwr vêl a chhinchhiah duh țhîn a, kei erawh hi chuan min neitu ka chhinchhiah tlat duh a ni. Min mutpui rawh, a nih loh chuan ințhen a țûl ang," ka han ti ve lehpek a. Kan ngawi dûn leh vang vang phawt a.

"I zawngchhang ang em? Vawi khat chiah aw?" a tih rual rual chuan, "Zawngchhang tlâk a nih chuan, ka hre lo le, i inpeih tawh em?" ka ti ve nghâl a.

Ka aw chu a khûr lek lekin ka hre mai. Ka hmûi pahnih chu a leiin a rawn hrût phei zei zei a, ka mûr chhuak vek a. A chung lam chu a rawn fâwp a, hnuai lamah a insuân thuai a, ka thaw țha hleithei hauh lo. Chutia a tih kual zauh zauh pah chuan a kut ding lamin ka hnute vei lam chu a rawn hmer zauh zauh a, ka khûr der der a ni tih chu a hai bîkin ka ring lo. A kut vei lam chuan ka mawng a rawn dawm a, a hmer a hmer bawk a.

Awm thiam a harsat êm avângin ka khûp leh ka khûp chu a insi chãwih chãwih a, kekawrte chhana hmer chu duh tâwk lovin a rawn zen lût ta a. Ka awm dân chu ka pian ahnu lama ka vawi khat tawnna a ni a, ka sawi fiah thiam lo.

A kut chu muangchângin, hnung lam ațangin hma lamah a rawn her kual a, ka mûr chiai chuai a, ka za chhuak vek a, ka fâwp nge min fâwp tih pawh ka hre chang mang tawh lo a. A țhingțhi a, hmanhnawh lo takin ka hâk lai neih chhun chu a pawtthla zai zai a. A phelh hnû chuan dîm têin kan sîra khumah chuan min zalh diai diai a.

Ka nûin thû min chah chu ka hre reng. Mahse, ka châkna chuan a chhêm mit lek lek tawh a ni. Ka rilrûah chuan 'sex' hman chhin châkna a lian ber tawh tlat a, ka nû thuchah ai chuan ka taksain hriat a duhna chu a lian zâwk zêl a. A tâwpah phei chuan a tâwp thlenpui tûrin ka inpeih ta hial a..

Chutia ka zangthal reng lai chuan a kawr chu a phelh a, khumah chuan a rawn lâwn nghâl a. A bawp pahnih chuan ka kâwng chu a rawn kâr cheh a, a hmêl ka hmuh chuan ka zak tlat a, a mit ka en ngam loh avângin ka hmâi ka hup tawp a nih chu!

"Bawih, i ta ka ni a, ka ta i ni tawh tih theihnghilh ngai tawh suh ang che," ka han ti chhuak hrâm hrâm a.

Ka kut pahnih chu a rawn la kâng a, a kut pahnih hmangin khumah chuan a rawn kawkalh ve ve a. Ka mitah tak chuan a rawn en a, a mitah tak chuan ka en ve bawk a. Rei tak chhûng chu min en vang vang a, kei pawhin ka en vawng vawng a. Ka biangah chuan a mittui chu a rawn far kauh a, "Mate, ka thei lo, ka thei lo a ni! I pasal hnênah chauh i thianghlimna hi chu hlân ang che aw," tih leh khum ațanga chhuk chu a ruàl a. A kawr chu a phih sawk a, pindan ațang chuan a chhuak a, kawngkhâr khâr rîin a zui nghâl a.

Khumah chuan ka bawk thên a, ka ke leng kual vêl pah chuan eng eng emaw ka ngaihtuah neuh neuh a, ka nui ka nui a. Biakhlatna hmangin ka nu chu chanchin ka hrilh vat a, a lâwm êm êm a. Chu mi nî ațang chuan ka nûin a duat zual sauhvin ka hre nghe nghe.

Zânah chuan ka Bawiha chu ka va INBOX a, kan inbiakna chu heti ang hi a ni..

Keimah: Bawih, FIAHNA i pal tlang e.
Bawiha: Mate, vawiin kha maw?
Keimah: Aw. Pawi em?
Bawiha: Pawi lo. Ti tak tak ta che ila?
Keimah: Min neih a țûl ngei ang..😘
Bawiha: Min nei duh ang em?
Keimah: Min duh lo mah la ka duh che.
Bawiha: Kan innei vat dâwn nia.
Keimah: I hman hun hun ka hman hun.
Bawiha: I va han mak tak! Muah..😘
Keimah: Infawh khân thâwk a harsa ê.
Bawiha: Ka zei ve tho lo maw?
Keimah: Zei lo, min ti thaw țha thei lo.
Bawiha: I zei lo turu buru hi a nuam.. 😂
Keimah: SEX a nuam em?
Bawiha: Nang nên a nawm ka ring.
Keimah: Vawi khat ti chhin tak tak ila?
Bawiha: Ka phal mai mai lo.. 😡
Keimah: Ka hre châk alâwm.. 😂
Bawiha: Mi dang mutpui mai rawh!
Keimah: Zawnga! Tenawm suh aw..
Bawiha: SEX, inneih hnûah, zan tin.. 😂
Keimah: I nghei zeuh zeuh ang..bleh
Bawiha: I thû vek alâwm, 50% te chu.
Keimah: I fapa nu nên, zan tin?
Bawiha: Zawngi! Tenawm suh aw..
Keimah: I la ngai fo em?
Bawiha: Nangmah ka ngâi fo che..😡
Keimah: Pichiu chiu.. 😂
Bawiha: KȚP ngun țan teh. Pawimawh.
Keimah: Min neih hunah.. 😂
Bawiha: KȚP lo ka duh lo aw.
Keimah: KȚP membar ka ni.. 😘
Bawiha: Inkhâwm lam te?
Keimah: Min hruai țhîn dâwn nia.. 😂
Bawiha: Nawi reng teh suh. Ninawm.
Keimah: Min ning maw?
Bawiha: Ning tih lêmah... Uffs
Keimah: Ka mu dâwn.. 😡
Bawiha: Huiham, ka hmangaih che.. 🙊
Keimah: Heiham, ka ngaina che..😘
Bawiha: I bulah chuan 18 ang vêl ka ni.
Keimah: I kiangah chuan 14 ka ni reng dâwn.. 😘
Bawiha: Monsterbate ngai em?
Keimah: Ne tu tu?
Bawiha: Mahni leh mahni jish ang hi.. 😂
Keimah: Sawi fiah deuh.
Bawiha: MASTURBATE maw le aw..
Keimah: google lawk ang e.
Bawiha: 😂 😂 😂
Keimah: Awi, vawi khat pawh ti lo.. 😡
Bawiha: Kei chu zeuh zeuh.. 😂
Keimah: Tenawm. Sim hmak rawh.
Bawiha: Hisâp țhîn che.. 😘
Keimah: In nu hlui pawh maw?
Bawiha: Tenawm. Sim hmak rawh.
Keimah: Innei leh mai ula?
Bawiha: Pialrâlah maw?
Keimah: Ka ti tak tak..😡
Bawiha: Min duh tawh lo. Pawi em?
Keimah: Nope. Min hisâp țhîn maw?
Bawiha: Nope. Ti ngai tawh lo.
Keimah: Ti ve chhin dâwn aw?
Bawiha: Ka phal mai mai lo.. 😡
Keimah: Zâninah ti chhin dâwn.. 😂
Bawiha: Mate, a țûl lo khawp ang.
Keimah: jk.. 😘
Bawiha: Huiham, min ti hah. Mu ang.
Keimah: Rawn lâwn leh la?
Bawiha: Hahaha..vawiin kha chu aw 😂
Keimah: Sawi lo ang. Ka za leh vek.
Bawiha: Ka lo ti tlang law law lo a.. 😂
Keimah: I fel ka ti.
Bawiha: Ka hmangaih che asin.
Keimah: Ka ring lek lek.
Bawiha: I la hre zêl dâwn alâwm.
Keimah: Mu ang. Zân a rei țan.
Bawiha: Mangțha muttui le.
Keimah: Nyte2 😘

Ka Bawiha hi fakawm tih rûk ve riauna ka nei a, vârzin ka ni tih a hriat avâng nge maw ni, vawi khat mah 'sex' hmanpui tûrin min sâwm hauh lo. A lài hmêl hmuh nuam ka tih êm țhin avângin keimah zâwk hian ka fiam țhîn mai pawh a. Tûn hma chuan ruihtheihthil a ti nasa ve țhîn a, zû erawh chu a in ngai meuh lo thung a ni.

Țum khat chu 'Mizo History' min zirtîr a duh tlat avângin MUSEUM min fanpui a, eng chanchin-chin emaw min hrilh țeuh a, uluk takin ka ngaihthlâksak zêl a, hriat rengna chhûngah erawh ka khung zo sêng chuang lo a. Museum sîra Pu Buanga leh Pu Zosâpthara lungphun bulah chuan thil te kan ei a, țawngțaina hmun an siamah te chuan kan țawngțai dûn bawk a.

Mac Donald Hills ațanga kan chhuk hnû chuan ka hah ve deuh hlek a, fiamthûin, "Bawih, min lo pua?" ka han ti a. Eng dang sawi set set lo chuan min châwi lawp a, ka malpui pahnih chu nghet takin a chelh tlat a, a kâwng hma lamah chuan a kut khinghnih chu a suih bet reng a, Zarkawt 'traffic point' kan thlengthla dâwn tihah chuan, "Bawih, tâwk tawh e," ka han ti a. Nui vur vur chungin a ngawi reng a, a kal miah miah a. Chuti chuan Dawrpui biak in kawt thleng min paw phei a nih chu!

Ka zak lutuk chu a pil thei ang berin a hnungzângah chuan ka hmâi ka phûm tlat a, ka hawi chhuak ngam lo hrim hrim. Kal vawh vawh pah chuan, "En teh Mate, miin hmuhnawm min ti hlawm lutuk," a rawn ti zui a, hmâi a sen țha dun sen sen asin aw..

Bazâr bula awm an nih avângin an inah chuan bazàr pahin lêng lût ve zauh zauh țhîn mah ila, tlângnêl harsa ka ti khawp mai. Ka lên ve chhun pawhin an ui vulh chiah ka be ngam fo a, inchung lama thlifîm dâwn dun erawh nuam ka ti êm êm thung.

Unâu tluka a en, țhian fel deuh mai a nei a, Edward ni mah sela, 'Ward' tiin a ko mai țhîn a, an ina hun thâwl zâwk kan hman tik a tam khawp mai.

Țum khat chu Edward-a te inah a awm thû min rawn hrilh a, ka hman a nih chuan kal tûrin min rawn sâwm a. Ka nû ka dîl hnû chuan ka insiam sawk sawk a, Ward-a te in pan chuan ka chhuak thuai a. Ka va thlen meuh chuan amah chauh hi a lo awm a, mi dang an chhuah thû min hrilh nghe nghe a.

Pindana a va luh hnû chuan zû a rawn keng chhuak ta mai a, "Mate, in dûn ve rêng rêng chhin ang hmiang?" tih pah chuan no pahnihah chuan a thli kerh kerh a. "Bawih, ka piana hnu lamah zû vawi khat mah ka la in lo hrim hrim. Mahse, i thû a nih chuan i duh zât zât ka in ang. Chu chu a ni mai," ka han ti a. A zu thlitsa chu chokaa tui dehna hmunah a va leih baw ve ve nghâl a, "FIAHNA i pal tlang ve bawk e," a ti a, a sèih séih a.

Hun a liam zêl a, kumhlui thlah zân a lo inher chhuak ve ta mai bawk a. Zanriah ei khama rawn lêng tûrin kan inbia a, zân dâr 11 hnûah pawh a la rawn inlan loh avângin thinrim țeuhin ka mu a, ka muhîl lo hrim hrim. Dâr 1 rîk dâwnah chuan kawngkhâr a rawn ri dawt dawt a, ka va hawn nâk chuan din pawh ding țha hleithei lo hian a lo rui a, "MADDIE, APPY NEAR! APPY NEAR!" tiin min han hrilh nghâl chu a nia'h..

Dîm takin, khawvêl rah chim hlâu ni âwm ang fahran hian thutțhlêng lam chu a pan phei chhet chhet a, a țhu nghâl hnáwk a. A lû a lian țha bawk a, a zo lo a ni mahna, a bu leh lâwp țhîn a. "MADDIE, RAWN DRU VE DEH, PLEASE!" a ti ta sek a. Thinchhe lung hian zâidamna a tlachham lehpek a niang chu, "Zâwnga, khati chung khân i rawn lêng ngam zâwk ka ti! Chhuak rawh! Haw nghâl rawh!" ka han ti ta piap piap a.

"MADDIE...*hik*...MIN, MIN..*hik*...NGAIDAM...*hik*...DRUH AW...*hik*...KA HAW...*hik*...NGE," tiin a irhfiak mawlh mawlh a. A ding hluai a, kal a han tum chuan a ke a phet a, chhuatah chuan a țhingțhi hnawk a. Ka ngei lutuk chuàn a hmâi ka zuk chûmsak siah a, chhuatah chuan thisen a far zawih zawih nghâl ta mai a. Hmanhmawh bak buka lêng siau an sawi ang maiin pindana lapua chu ka va la vat a, kan han inbuaipui leh lâwp lâwp a. Bawiha laka ka lungawi loh apiangin chu zân lungchhiatthlâk tak chu ka hre chhuak fo a, ka nuih theih phah a, ka lung a awi phah leh fo bawk.

"Mami, hre thiam rawh. Mipa dân alâwm, riak ve mai rawh se. Buaina a tâwk palh ang. Mut tum r'u," ka nûin a rawn tih chuan ka rilru a dam nghâl vek a ni.

Chhuata mutna ka siamsak zawh hnû chuan bual inah ka kuah phei a, hersâwpah ka țhuttîr a, a harh phah deuh ringin a chhîpsam ațang chuan tuiin ka leih ngat ngat a. A thuamhnaw ka phelhsak vek hnû chuan mu tûrin ka kuah phei leh a, mutna ka siamsakah chuan harsa ti takin kan inzalh thei hrâm a. Pindan lamah lûtin, ka nâu bulah chuan ka va inthawlh nghâl ve mai bawk a.

Dâr 3 vêl ațang chuan ka Bawiha chu a rûm a rûm ta mai a. Ka ngaihsak loh chuan ka inngaidam thei ngai dâwn lova ka inhriat avângin a bulah chuan a rûk thei ang berin ka va phei dêm dêm a, ka va mu ve ta a. Sawi harh ka han tum chhin a, awmzia a nei lo a. A rawn rûm apiangin a âwm ka chûlsak ziah a, a ziaawm phah deuhin ka hria. Chu mi zân chuan ka muhil lo hrim hrim a ni.

VALENTINE'S DAY a lo nia, chawhma chhûng chu ka nu puanțhui ka pui a, chawhnu lamah chuan kan intiam angin inhmu tûrin ka chhuak ve ta a. Lên huai nân tiin a vawi khatna atân 'grape wine' ûm khat ka in zo vek a, a tih dân țhin pangngai angin 'bus stand' bulah ngei chuan min lo hmuak leh bawk a. Thui kan kal hmâin ka lû chu rin phâk bâkin a rawn hai ta tlat pek a, "Mate, tinge zû i in a? A van zia lo ve maw le," tiin a hre thiam nghâl vek a. "Bawih? I in a, ka in ve a ni mai. I hre thiam em? No sorry, no thank you - i hre thiam em?" ka ti pâng pâng a, ka pai deuh chhat chhat țanin ka hria a.

Thâwk a la halh halh a, a kûn lawk a, min paw ta mai a. Ka zak dâwn emaw ka tia, nuam ka ti daih. A nghâwngah chuan ka lû ka nghat a, a dàr bâtin ka kuah a, mi dang kal vêl chu ka hmu phê ruai a, hla hrang hrang sâin ka zâi char char a. "Bawih, lo țhu lawk," tih pah chuan 'step'-ah min țhuttîr a. An in kawtah kan lo awm reng tawh hi a lo nia. A chho zawk a, a rawn chhuk leh nghâl a. "Le'm," tih pahin min châwi lawp a, an inah chuan min pawm chho ta a.

Min pawm chho zêl a, a pindana khumah chuan min muttîr a, "Mate, ka in leh tawh ngai lo ang tih ka tiam a che. Min tiam ve thei em?" a ti a. Min puak ațanga a țawng chhuah hmasak ber a ni. Ka ngawi reng a, ka menin ka thil hmuh apiang a insawi bulh bulh a, ka maimitchhinin ka lû a vir mup mup mai bawi sia, "Bawih, thei. Tiam tlat e. Ka luak a chhuak lutuk," ka tih vêleh min tung tho a, bual inah min hruai lût a, "Luak rawh, i ziaawm sawng sawng mai ang," a ti a.

Ka luak bawrh bawrh a, ka hmûi leh a vêl te chu rawmawl huhin a rawn hru thiak thuak a, khumah chuan min kuah phei leh nghâl a. Ka kianga a rawn mut hnû chuan, "Bawih, dâr 5-ah min kai tho dâwn nia, ka muhil lawk duh," ka han tih chuan, "I thû vek alâwm, a chanve chu," a ti a, rei lo têah chuan ka muhil ta a ni.

Ka han harh leh chuan ka puma kut nghatin ani pawh chu a lo muhil mêk a, sana ka han en chuan zân dâr 11 a lo pêl tawh hi a lo nia, "Awi LALPA!" ka tih ri chuan a kai tho nghâl a niang chu, "LALPA ka ni lo nâa mu rawh. I nû ka dîl tawh. Rem a ti. I ril a țam em?" a ti a, ka rilru damzia mai chu!

'Dressing table' lama chaw leh chawhmeh a dah te ka ei zawh hnû chuan a kiangah chuan ka va mu leh a, "Bawih, ka awm hlen dâwn aw? I phal em?" tiin ka zâwt chawt a, "Phal. I nûin a phal lo," tiin min chhâng a. Ka nu a zahzia ka hriat belh lehpek a, ka lâwm khawp mai. Kan inen vawng vawng a, ka sam a rawn khawih niap niap a, "Muthilh tum ila?" a tih hnû chuan a âwma beiin ka va kuah ta a. Rimawi țhahnemtham tak ka ngaithla țhîn; nimahsela, chûng rimawi zawng zawng aia ri mawi ka tih ber chu ka Bawiha thin, mâwi taka phû chu a ni.

Dârkar chanve hnû vêlah chuan, "Mate, i la harh em?" a rawn ti a, "Ka muhîl tawh, eng nge?" ka han tih chuan, "Ti chhin ang hmiang? I hre châk a ni lo'm ni?" a rawn ti ta mai a. Chhân dân tûr ka ngaihtuah mêk lai chuan, "Mate, min hmangaih tak zet a nih chuan min mutpui ang," a rawn ti leh a. Heti hian ka chhâng a, "Bawih, i chil per kha pindan pâwnah va ûm chhuak la, rawn lût leh tawh suh ang che. Zîngah min rawn kai tho mai dâwn nia," tiin. A nui ri chhuak hawm hawm a, thâwm dim a țûl êm avângin a insûm leh ta hrâm hrâm a.

"Mate, FIAHNA i pal tlang lehpek e, muhil ang," tih pah chuan ka pumah a kut a rawn nghat a, a rualin kan maimitchhîng ta a. Chu mi zân chuan ka muhil zauh zauh a, ka harh apiangin ka sam a lo zût ziap ziap ziah a, lungawithlâk tak a ni.

A tûkah chuan a rûk thei ang berin an in chu kan chhuahsan a, kan in thlengin min thlah a. Thingpui ka lumsak lai chuan ka nu nên an titi ka hre phâk a, "Bawiha, nizânah eng nge in tih?" tia ka nû zawhna chu, "Matei Nu, tih kan duh lo ve ve. Kan piangthar tawh," tih pahin a nui ri kiah kiah a; a nui apiang kan nui fo a, nuihna tûr hi a tam țhîn a ni e.

Țum khat chu Edwardan min rawn 'call' a, "I Bawiha nên in inhmu ngai em? Damdawi te hi a khawih leh tawh a ni mai lo maw? A zawrhna bâwr vêlah miin a tam leh țan riau an tia," a rawn ti ta mai a. "Eng a? Ward, a van mak dâwn ve maw le. Tûn lai chu lo lama an buai fo avângin a rawn lêng ngai lo a, ka va be nghâl dawn," tih pahih kan inbiak lai chu ka ti tâwp nghâl a. Bawiha chu ka va call nghâl a..

"Mate. Eng nge ni ta, Duat?" a rawn tih chuan ka haw deuh tlat a, "Eng vângin nge ruihtheihthil i khawih leh a? Mawh a? Ka hre vek! Eng vângin nge ka inkhâwm a, KȚP lamah te a kûl a taia inhman ve tlat ka tum țhin, i hria em? Nang, i inkhâwm ngai em? Min hrilhtu kha," ka han ti miah miah a. A ngawi reng a, âw a thian kharh kharh a, "Mate, ka fapa chungchângah buaina ka tâwk a, ka inkhâwm khât khawp mai. Min lo țawngțaipui teh, khawngaihin," tia min hrilh hnû chuan ka hnuk a ulh deuh a, a hun tawn ka hriatpui ve si lo. A rûk chuan ințhen nghâl mai ka duh rum rum a, thinchhe zia chu thup ka tum hrâm hrâm a, a châng chuan a harsa ve deuh țhîn.

"I sim hmâ chu min rawn be tawh suh ang che. Kei pawhin ka rawn be tawh rih lo bawk ang che. Sim tum la, ka lo țawngțaipui țhîn dâwn che nia aw?" tiin, mittui parawl țeuh chung chuan ka han sawi zo hrâm a. A ngawi reng a, ka han ngaichâng deuh vang vang a, engmah a rawn sawi loh avâng chuan biakbûr chu ka dah hmak a ni.

Min hmangaih tak zet a nih chuan Pathian avâng lo pawhin, keimah avâng tal pawhin a sim ngei besei tlat chungin ka ngaihven ru reng a, Rescue Centre Annexe - Sihphîr lama a luh thû te, thawktu anga hun a hman  chhunzawm thû te ka hriat chuan min ti lâwm êm êm fo țhîn a ni. A rawn haw leh hnû chuan hlim takin hun kan hmang leh thei țan ta a..

https://m.facebook.com/groups/160607990683254?view=permalink&id=1804052356338801&ref=m_notif&notif_t=group_comment&notif_id=1531992166200422&notif_ref=m_beeper ...hi han chhiar mai la!

Chutia AIDS a vei a ni tih kan han hriat hnû chuan ka inngaihtuah nasa ve țhîn khawp mai. Ka nû ka hrilh a, țhen tûrin min hrilh nawn fo țhîn a. Ka ngaihtuahna a nu but but fo mai. Ka țhen thei thlâwt lo a ni e. HMANGAIHNA HI ÂTNA CHI KHAT a nihzia chu ka hre fiah ve tial tial a, a duh lo chung pawhin keimah zâwk hian an inah te lêngin ka va inti chhuak hrâm hrâm țhîn a, hmangaihtu a nei reng a ni tih hre tlat sela ka duh êm êm atin ni.

Ka nû ka zah lo tihna ni lovin, ka thinlung khauh tak avângin ka hlâu zo lo a, ka nâu te pawhin a thû an awih loh phah fo a. A mangang ngang a niang chu, mâkpa chhûngkhungin pasal kawlh zet mai a nei hmiah a, kan unâuvin mak kan ti tâwp thei lo. Ka pahrawn chuan kan unâuvin kut min thlâk fo a, luhlul phah nân hmang mah ila amah kan hlauh êm avângin a thû kan awih a ngai mai țhîn.

Edward-a nên kan inbe reng a, a rûkin ka Bawiha chanchin chu ka ngaihven reng a, in ațangin a chhuak a ni tih ka han hriat hnû phei chuan lungchhe takin ka zawng ru ruai ruai țhîn a. INBOX a chhâng duh lo a, CALL a la duh ngai lo bawk sî nên, biak ngaihna a awm tlat lo. Ruihhlo a zuar a ni tih ka hriat hnû phei chuan pâwna chhuah nikhua hian ruihtheihthil an zawrhna hmun nia Edwardan min hrilhna lamah te chuan ka zawng kual fo țhîn.

Țum khat chu bazârpuiah kan inhmu hlauh a, nilêngin kan buai nak nak a, 'lock up' lamah te kan kal lâwp lâwp a. Mahse, ka thinlung chu a hlim nilêng a ni mai e. Ka hmuh châk ber ka hmu ta chu ka lâwm khawp mai. AIDS  a vei avângin min duh lo a, AIDS vei ka vèi avângin amah chu phatsan ka tum bîk hauh lo thung a. Chu mi zân chuan ka haw tlai deuh a, chhûngkua kan inhâu deuh a. Mi dang an mut hnû chuan pawisa ka khâwl ang ang leh thuamhnaw țhenkhat chu iptêah ka ak sawk sawk a, dam chhûnga a kianga awm tawh tûrin rilru ka siam fel a, in chu ka chhuahsan ta a ni.

A riah țhinna hrang hranga ka zawn hnû chuan City Park bula inrelah ka va hmu chhuak a, kan intih thiam lo deuh avângin țhian te inah ka kalsan ta a. Bawihan min duh tawh lo a, inah ka haw duh tawh bawk si lo a, țhian te ina riah reng a rem țeuh si lo. CALL GIRL ni ve mai tûrin rilru ka siam fel a, ka duh tak kianga awm hlen theihna awmchhun a ni tlat.

Zâna chhuah châng te hian ka zawng țhîn a, a riah țhinna hmunah te ka kal fo a, mittui nên khawhar taka kan inkawm a țûl leh sî țhîn a.

Zan khat chu ka 'customer' pakhat nên Ritz Hotel 'bar' chhûnga zû kan in laiin Edward-a leh a țhianpa pakhat hi an rawn lût hlawl a, minit khat chhûngin ka Bawiha a enkawl mêk thû leh ka hming sawi a bâng ngai lo tih thû te chu min han hrilh ru sê sê a, lâwmnain ka khat a.

Pawisa intuak ngah hunah in luah tûr zawnpui a, hruai luh ka tum rilru tlat a ni. Thla thum vêl ka 'service' hnû chuan besei phâk loh thil a thleng a, ka Bawiha zâwk chuan min rawn be hmasa ve teh mial a, a aw ka han hriat chuan ka hnuk a ulh țeuh a, ka mittui a luang thla ngiai ngiai a. Chanchin kan inhrilh a, eng eng emaw kan sawi luam hnû chuan a tûka thisen la tûrin kan intiam rual ta a. A tûkah chuan thisen kan 'test' dûn lehpek a, ka thuamhnaw te min lâkpui zawh hnû chuan ka riah țhinna 'hotel' chu kan chhuahsan a, thû ka intiam tawh angin kan inah min thlah haw ta a.

Chu mi zân ațang chuan ka dam lo țan a, ka khawsik chuan min kiansan rei ngai meuh lo a. A tûkah chuan zâna mut ka kham loh fo avâng a ni ang e, chawhnu dâr 1 rîk dâwnah ka harh ve chauh a. Ka nu chuan puan a lo țhui malh malh a, ka pahrawn zu rui chu țhutthlêngah bawk chuan kâ âng phuau hian a lo muhil ve mêk bawk a. Lukham sîra ka biakbûr chu ka la thuai a, "Bawih, thawh ka hai a. Min ngaidam rawh aw?" ka va ti nghâl a. "Mate, i nûin i dam loh thû min hrilh a. Kan thisen rizal ka lam a, Pathian zârah Baja Tlângah damna ka han chhar a, kan NEGATIVE ve ve tawh asin. Kan innei vat dâwn nia, inenkawl țha la," tia min hrilh lai chuan mak tiin ka ka hó a, awih harsa ka ti lutuk ringawt. Ka mittui chu dan rual lohvin a tla mial mial a..

Rin aii ka țha chak lo a, pâwna chhuah ka peih meuh loh fo avângin a hman châng apiangin min rawn kan țhîn a, ei tûr min rawn kensak ziah bawk a. Amaherawhchu, ka pa nên erawh chuan an titi dûn khât khawp mai, ka nu nên an inkâwm deuh ber țhîn a.

Zan khat chu ka muhîl hleithei lo a, pindan ațanga chhuakin țhutthlêngah chuan TV en pahin ka mu mai mai a. GOD-TV ka han hmet chhuak a, pastor 'Benny Hinn - This is your day' tih hi a lo chhuak a. LPS-3 lama hmeh sawn ka han tum chuan, "STOP! HOLD IT, HOLD IT. From India, please don't change the channel. Listen, you are an AIDS victim and this is going to be your day.."
(Lawkin! Ngawi lawk, ngawi lawk. India mi kha, khawngaihin hmet sawn suh ang che. En teh, AIDS vei i ni a, vawiin hi i nî a ni dâwn a..) LIVE  chu a ni lo tih ka hre chiang khawp mai. Ngaithla chiang tûrin ka țhu nghâl vat a. Eng eng emaw a sawi zawm zêl lai chuan ka mûr chuai chuai a, ka hmul thî zawng zawng a rawn ding suau a, vawi thum lai chu choka 'gas lighter' hmanga kah țêk țhawt țhawt ang maiin ka țêk chhawk chhawk a. TV ațang chuan, "I taksaah LALPA thiltihtheihna a kal tlang mêk a, hlâu suh ang che. I dam dâwn a ni," tiin Pastor-a chuan thû a sawi zawm zêl tak nâa, ka khûr zawih zawih a, ka khûp pahnih te chu an inkhâwng zawt zawin ka hre mai a.

"MADDIE, you are healed! You are healed. PRAISE THE LORD!" a tih lai chuan ka hlauh êm avângin TV chu va hmeh hlum tumin ka han tho dâwn a, boruak mak takin min bawh avângin ka pên chhuak thei tlat lo mai. Chhuatah chuan ka țhingțhi hnawk a, ka taksa pumpui chu a hit chhuak vek a, ka thidang ta hial a.

Ka han harh chuan ka Bawiha chu ka kiangah a lo țhu a, "Mate, i nu a mangang deuh a, ka rawn chhuk nghâl a nih hi. Eng nge i an?" a rawn ti nghâl var a.

"Bawih, tinge dâwt min hrilh a?" ka han tih chuan mak ti deuh mai hian, "Eng dâwt maw?" a rawn ti vat a. "AIDS ka vei ve hman alâwm, Pastor pakhatin min hrilh a," tiin ka chhâng a.

"Mate, i dam loh chuan ka dam lo a ni mai," a ti sap a. Ka kut chu a la kâng zauh a, ama 'engagement ring' min pêk ka bun lai chu a fâwp zeuh a..

- Tlângau@Artui uih Street.


( Khawngaihin ads awm hi lo click ve la.)
Previous
Next Post

No comments:

Thanks for your comment.