ZU ZUAR FANU 2

CHAPTER--2
Ziaktu: R'z Thangluah
Columnist, www.tleirawl.

Msi pawh chu a nu in school chawlh mai a phalloh avang chuan a zir zawm ve leh ta a. Class-Xii exam chu a hmabak ve ta ran mai le. A theih tawpin a zir ve ṭang ṭang a,a ṭul apiangah a nu a pui bawk ṭhin a ni. Mahse,a nu hian zu lam kaihhnawih reng reng chu a khawih tir duhlo thung a ni. Tichuan,a nu zu zawrh na aṭanga an pawisa hmuh chu an nufa pawisa hmuh na a ve mai a. Thla tin,In luah man,tui bill,electric bill a lo ngai a;a kar lakah gas lak a lo ngai ve leh ṭhin bawk nen. An buai ve hle ṭhin;mahse,an in luahna neitu hian kawng engkimah a hrethiam em em a. In luah man te pawh pek tur an neilo anihchuan a phût ngailo a ni. Mahse,Msi nu hian lei ba neih hi a duh loh ber anih ṭhin avangin in luah man kher kher hi chu a ba ngai lo a ni.

Msi chuan a room-ah lehkha a zir ngawrh hle mai a. A lehkha zirah a rilru a pek nasat em vang a ni ngei ang,a nu in a rawn koh tih pawh a lo hrelo a. A nu chuan,"Bawihte,hei thingpui aw i chhawlhal tawh ang,"tiin a fanu darah chuan dim te in a rawn vuan a. Msi chu a rawn hawi chhuak rang kher mai,"Nu,tinge min lo pek duh a? Keimahin ka rawn insiam ve mai dawn lawm,min ngaihtuah leh lutuk a nuam pawh ka tilo,"tiin a nu chu a lo nuih ver ver a. Pi Ruati chuan a fanu sam a chul pahin,"Bawihte,nang hi khawvela ka neihchhun i ni tih hi hre reng rawh aw. Ṭha deuhin i zir dawn nia aw ka hmangaih che bawihte,"tih pahin Msi chalah chuan a fawp zauh a. Msi pawh chuan,"Nu,nangpawh khawvela ka neihchhun i ni ve tho lawm. Keipawn ka hmangaih che,"tih pahin a nu kut chu a la,a fawp vawng vawng a.

Sangtea chuan zu no 1 chu a tlak leh pawp mai a,"Khanglang a,mipa ka ni lawm. Ka duh duh danin ka nung ang,mipa puitling ka ni ve tawh,"tiin amah chauh chuan a lo phun bul bul a. Pi Ruati chuan,"Khaih khaih ngatinge i va phun nasa ve a?,"a lo ti nghal hlut a. Sangtea chuan,"Kan in chhung khi ka ning ka hne hluah hluah. Fapa neihchhun tiin an duh duh danin min control an tum a,ka duh teuhlo mai,"a ti leh pung pung a,no 1 dang leh chu a tlak leh pawp a. Pi Ruati chuan,"Khai aww i rui tawh lutuk anihkha,in belh tawhlo mai rawh. I chhungte chuan an hmangaih vang che in control che an tum anihchu. Diktak chuan i pa pawh pa zahawm tak a ni a,i nu leh i u te pawh an fel em em bawk a. Hetianga an fapa neih chhun i awm hi chu an rilru a na ve dawn êm a sin,"tiin dam thlap hian a lo ti a. Dawhkan zu leh zu no pawh chu a la kiang daih a. Sangtea chuan,"Ni e i sawi chu a dik maithei. Mahse maw,kan in chhung khur boruak khi a hrehawm lutuk. Pawn lam aṭang chuan chhungkaw ṭha tak angin kan lang ang. Mahse,chhung lam erawh a tuiek vek,"a ti zui leh bawrh bawrh a. Pi Ruati chuan,"Khaih khaih khatin mahni chhungkua an ti ngai lo. I rui tawh anihkha,mu hahdam rih la. I harh hunah i haw dawn nia aw,"tiin ṭhutthleng seiah chuan a mut tir a,Sangtea pawh chu a muhil zui ve nghal mai a. Pi Ruati chuan Sangtea chu a en vang vang a,"I lainatawm hle mai,in chhungkaw awmdan i sawi kha a dik anih ngai chuan hetianga i awm pawh hi ka dem hran lo che,"a ti zui sap a,dawhkan vel chu a ti fai a. Hmun a hawl fai a,ngawi rengin an tukverh bulah chuan a ṭhu ta reng a.

Zan dar 7.00pm a ri tawh a,Sangtea tlai leng chu a lo la haw lo. Pu Thanga chuan,"Khawiah tak chuan kal ni maw? A rawn haw hun chu ka vaw khawp ang,Home ah te hian awm se a ṭha ang,"tiin a âng buan buan mai a. Pi Zuali chuan,"Tikhan i ti ve ziah a,a hun a lo thleng a nga i vaw leh tak tak ngam chuanglo ang. A hrim hrim in tlangval te an ni ve tawh a,an duh duh naah an leng ve ang chu,"a lo ti ve hlak hlak a. Pu Thanga chuan,"I lo hetih ziah vang hi lawm a ṭhat theih loh. Han zilh deuh ila,i lo ṭan pherh erh zel a nangmah hi anih hi tisualtu ber,"tiin thinrim tih hriat takin room lamah chuan a kal nal nal a. Pi Zuali chuan,"Ka tihsual anihna ka hrelo e a,kan fapa hian rual a pawl ve a ni mai,"a ti leh deuh hmuk a. Partei chuan,"Nu,ka ṭhiannu te inah hla kan en lawk dawn nia aw. Kan reilo ang,"tih leh chhuah a rual a.

Pi Ruati chuan,"Bawihte,ka inbual dawn sin. Helamah hian rawn phei rih la,in tih harh pah ni mai lawm. Kan inleng pa hi i lo vil loh chuan...hei a chatthla der mai bawk si. Ka reilo ang aw,ka in tleuh zuai nga ni mai,"tiin in thlahrung tih hriat takin a fanu chu a rawn ko a. Msi pawh chuan a nu thusawi zawmin ngawi rengin sitting roomah chuan Sangtea chatthla chu a vil ve kur mai a.

A nu inbual tura a luh hnu rei vak lovah chuan Sangtea chu a rawn che ṭual ṭual a. Ṭhutthleng aṭang chuan a rawn thla thla dawp mai a,"Awiii i ṭha em?,"tih pahin Msi chuan a sawi nghal nawk nawk a. Sangtea lah chu a hnar zui nghal bawrh bawrh thung a,Msi chuan,"Hmm i van chhe tak,"tih pahin a kalsan rang kher mai.

Sangtea chu chhuatah chuan a hnar bawrh bawrh mai a. Msi chuan,"I van nuihzatthlak reuh tak,"tih sup pahin Sangtea chatthla lai chu a phone camera chuan thla a lak sak zauh a. Nui vur vur chungin,a phone chu a ak leh nghal vat a.

Pu Thanga chu an in chhung dungah chuan a tei kual sek mai a. Pi Zuali lah chuan a phone bak a ngaihtuah silo,a chang leh a rawn nui chhuak leh hawk hawk ṭhin a. Pu Thanga chuan,"Engnge maw i hriat le nangmah a i nuih leh  vak vak ṭhin a? Mi â nghal lo chuan,"a lo ti hluk a. Pi Zuali lah chuan nui kur kur chungin,"Zo sap a an thil post hi maw le,"tih pahin a pasal chu a en tir ve a. Pu Thanga chuan,"A ho mai mai e mai,nutling pui tawhin Zo sap Zo sap tih reng pawh kha a mawi lo. A zah pawh a zahthlak,khatiang mai mai aichuan i fapa call rawh,"a ti leh hluk hluk a. Pi Zuali chuan,"Aww nangmah pawn call ve mai la,phone nei lo pawh i nih loh kha,"a lo ti leh hlak hlak a. Pu Thanga chuan,"Vawi 20 chuang ka call tawh ang,ka call a chhang duh hleinem,"a lo ti ve leh hluk a. Pi Zuali chuan,"I call a chhan duh loh chuan,ka call pawh a chhang duh awmlo e mai a,"tih pahin a smart phone hlai hlep hlup chu a tuai leh ang niap niap a.  Pu Thanga chuan,"Hmmmh i tih tih khan ti teh a,ka leng dawn,"tih pahin a chhuak nghal nul nul a.

Sangtea pawh chu zan dar 8.30pm velah chuan a rawn harh ve hlawl mai a. Pi Ruati chuan,"E kha i rawn harh ve thei ta maw? I ṭha em?,"a lo ti nghal vat a. Sangtea chuan,"Aw ka ṭha lawm,e khai a va tlai tawh ve ka haw nghal a ngai. Ka pa a thinrim tawh ngawt ang,"tih pahin kal mai a tum a. Pi Ruati chuan,"Khatin kal ringawt suh,i hmai te kha va phih la va in sil fai phawt teh. Khatiang pheng phung kha chuan i pa hmu suh,"a lo ti vat a. Sangtea pawh chu bathroom lam pan chuan a kal ve nghal mai. Rei ngial a va awm hnuah a rawn chhuak leh a,Pi Ruati chuan towel pek pahin,"Kha in hru hul la,i haw dawn nia,"a lo ti vat a. Sangtea chuan,"Ka lawm e aw,"tih pah chuan a in hru hul malh malh a. Ṭhutthleng sei a Msi lo ṭhu reng chu a zu melh zawk a,Msi pawh chuan a lo en ve reng chu niin. Chutia Sangtea'n a rawn melh zawk takah chuan a hawi sawn rang kher mai. Sangtea bawk chuan,"Umm nih ka han haw chho phawt nge aw,muttui phawt u aw,"tih pah chuan kawngka lam chu a pan phei nghal a. Pi Ruati chuan,"Awle nangpawh muttui le,"tih pahin kawngka bul thleng chuan a va thlah a.

Msi chuan,"Nu,amak ka ti e,"a lo ti ri gawt a. Pi Ruati chuan,"Engchu maw?,"tih pahin towel chu a zar pharh nghal mawlh mawlh a. Msi chuan,"Sangtea hi maw le,a pa kohhran upa ania. A nu leh a u te lah nise kohhranah an in hmang em em a,"a ti leh a. Pi Ruati chuan,"Ni e keipawn mak ka ti a lawm. Mahse,ka hrilh ṭhin che kha hre reng la aw,mi tu pawh hi an ṭhat loh na aiin an ṭhatna hi hmuh tum hram hram tur. Tin,Sangtea zu in ṭhin thu pawh hi pawn lamah chuan sawi loh tur a nia aw. Mi chanchin sawi vak vak te hi ṭullo a kam tam na a nia,chuvangin ka bula i sawi vak hi chu khawiah mah sawi suh aw,"tiin a fanu chu a chah leh mawlh mawlh mai a. Msi chuan,"Awle Nu,ka hria lawm. I fanu ka nih hi,"tih pahin nui var var chungin a nu chu a kuah vawng vawng a.

Sangtea chu zu rim nam vung vung chungin a haw leh a. Kalkawng tluan chuan Msi te nufa in hmangaih zia hlir chu a ngaihtuah a. Msi nu chu zu zuar mai ni mah se,a fanu chu a hmangaihin a ngaihsak em em a. Thu ṭha tin reng a hrilh ṭhin,Msi pawn a nu chu zu zuar ni mah se,a zah in a hmangaih em em a ni. Sangtea chuan an chhungkaw dinhmun leh Msi te nufa dinhmun chu a khaikhin ṭhin a,an chhungkua teh thlawt aichuan Msi te nufa/chhungkaw dinhmun chu a awt zawk fe a ni.

Sitting roomah chuan a nu chu amah chauhin a lo ṭhu a,a fapa chu a lo haw a ni tih pawh a hre lo. A phone khawih lai chiah chu a rilruah a awm a ni,Sangtea pawh chu ngawi rengin a room lamah chuan a lut chho tlang ve nghal a. Reilo te a khumah chuan a mut vang vang hnuah inbual turin bath room lamah a lut ta a.

Pathianni zing a ni a,Sangtea te chhungkua chu zing dar 8.00am ah pawh phone an la khawih far hlawm mai a. Sangtea chuan,"Chaw kan la ei dawn lo mi? Inkhawm ṭan dawn ṭepah hmanhmawh tawkin in chhuak leh a nga,"a rawn ti deuh kher a. Partei chuan,"I duh chuan siam la ti nia,kan la siam hmanlo anih hi,"a lo ti hluk a. Sangtea chuan,"Engnge i tih a? Phone i khawih vang khan mi i hman loh a?,"a ti leh kher a. Partei chuan,"Ka duh duh ka ti ang,i u ka nih hi min chhang zawt zawt lo mai rawh,"a rawn ti leh hluk hluk a. Sangtea chuan,"Ka ngaihdan chuan u te chu entawn tlakin an nung tur a ni. Mahse,nang hi chu i nunah entawn tur ka hmu hlawl lo,"tih pahin ama ei tur chauh chu a siam malh malh a. Pi Zuali chuan,"Aww kan vaia ei turin siam ve nghal law law mai la aw. Nangpawh hi i ngeiawm thei ṭhin lutuk a,"tih pahin chaw ei chu a rawn siam chhun zawm nghal a. Sangtea chuan engmah a sawi tawhlo,a chawhmeh duh zawng ho chu bowl ah suakin a room ah a in chawi ta daih a.

Pu Thanga chuan,"In hnial leh in hauh reng te hi in ning ve lo a mi?,"a lo ti leh a. Pi Zuali chuan,"Phun phun lo khan lo ei mai mai teh,hei inkhawm kan tlai dawn tak ngial ania,"a lo ti nghal mawlh mawlh a. Ely chuan,"Ninawm hlawm e,chaw ei dawn apiangin in inhau ziah mai. Vawiin chu ka inkhawm dawnlo nia aw,ka lu na ka peih lo,"a lo ti ve leh hlak hlak a. Pi Zuali chuan,"I phone khawih nasa lutuk lu na aniang chu maw le aw,"a lo ti vat a. Ely chuan,"Ka phone khawih hi in puh ve ziah a,nangni pawn in khawih ve tho a na pawh in sawi ngai loh kha. Ka ning chaw ei pawh tuilo,ka mu dawn,"tih pahin a chaw thleng a chawi a,a kham ta daih a. Pu Thanga chuan,"In va han in chhun nufa hlawm tak e aw,"a lo ti zauh pek a. Chutah a nupui chu a rawn ter at mai,"Enga? I fa te hian i ṭhat loh lai hlir anih hi an lak ni. Min puh ve tei vet suh aw,"a lo ti nghal tun tun a. Partei chuan,"Awii ka ning ka ning...ka kham,"tih pahin chaw thleng a chawi a,a kham ve nghal daih a. Reilo te hnuah nu ber pawh chu a kham ve nulh a. Pu Thanga chuan,"Immm in duh leh kham vek rawh u,keimahin ka ei ṭeuh nga ni mai lawm. Tlaiah khawnge a sa? tiin rawn zawng reng reng suh ang che u,"tih pahin amahin a ei mawlh mawlh mai a.

Msi pawh chu inkhawm turin a insiam malh malh a. A nu thil tih chu a ṭhalo tih hre reng mah se,Pathian leh kohhran hlat phah nan hman a tum lo a ni. A nu erawh inkhawm chak ve viau mah se,a thil tih avang chuan kohhran leh khawtlangah a in kiltawih a a inkhawm ve ngai meuh lo a ni. A fanu inkhawm tur erawh chu,"Bawihte,ṭha deuhin awm la. Midang te entawn tlak ni turin i nun uluk ang che aw,"tiin a thlah liam thung a.

Sangtea erawh chu inkhawm lovin,a roomah computer games a khel leh a. Inkhawm banah a ṭhianpa a rawn leng a,veng mawng lamah bawk an in zui thla leh hnak hnak a.

Msi inkhawm bang chuan a hmaa Sangtea te ṭhian dun kal chu a um pha lek lek tawh a. An hnungah chuan ngawi rengin a kal ve hnak hnak a,an thusawi erawh hriat loh tum sateh mah se,a hre ta tho tho a. Sangtea chuan,"Bawiha,kan in chhung hrehawm tak a awm reng aichuan Nu Ruati te ina zu in tura kal hi nuam ka ti zawk. A chhan i hre duh em?,"a tih zawm nghal zat a. Lawma chuan,"A fanu khu i lo imaita ni maw?,"tih pahin a nui hak hak a. Sangtea chuan,"Chutiang lam nilo e,an nufa leh an chhungkua hi ka awt em a tin ni. An nufa hi i chîk ve ngailo mi? Keichuan ka chîk ṭhin a sin,Nu Ruati hi zu zuar ni mah se,a fanu tan nu ṭha tak a ni thei a sin. Mahse,ka nu hi en la,ka nu hian zu a zuar lo thuamhnaw dawr erawh lian deuh a nei. Mahse,a hnen aṭang hian Msi'n nu hmangaihna a dawn ang hi ka dawng ve lo ti ila a dik ber ang,"a ti ve hlawl mai a. Msi'n Sangtea thusawi a hriat chuan a ding chat a,kawngkawia an kal liam thleng chuan a en zui a. A hnu fee ah an in lam pan chuan a haw ve leh ta a.

Msi'n an kawngkhar a hawn rual rual chuan, Sangtea te ṭhian dun chuan an zu no dawm lai chu an dahṭha nghal rawk rawk a. Msi pawh chuan Sangtea ṭhian dun chu hmu lo ang chiangin a awm a,room ah a lut tlang nghal a. A in thlak nghal mawlh mawlh a,a in thlak zawh chuan Sangtea thusawi chu a ngaihtuah let leh a,"Kan ina a rawn kal ziah chhan chu a zu in duh vang hrim hrim pawh a nilo a ni maw?,"tiin a phun sep sep a. Rei vak lo hnuah a nu chuan a rawn ko a,"Bawihte,thingpui rawn in la hei ka siam peih diam tawh ania aw,"a rawn ti a. Msi pawh chuan,"Awle ka lo kal,"tih pahin sitting room lamah chuan a rawn chhuak a.

Sitting roomah chuan a nu leh Sangtea chiah an lo awm tawh a,"Khawnge i ṭhianpa kha?,"a ti hâ mai a. Sangtea chuan Msi'n a biak hmasak avang chuan mak a ti hle mai a,nidangah chuan a biak hmasak loh chuan Msi hian a be ngailo kha a ni a. Mahse,vawiin chu zawhna a rawn zawt ve tlat mai,"Aaa a cousin birthday an lawm dawn a,a kal ta nihkha,"a lo ti vat a,"Ms,vawiin chu min hrethiam hram rawh aw. Vawiin bak chu ka in tawh dawn lova,naktuk aṭangin ka pa in thingtlangah min thawn bo a tum a. Chuvang chuan vawiin chu kan ti nghek teh ang,"tih pahin a no dawm lai chu a tlak leh pup mai a. Msi chuan ngawi renga thingpui in pah chuan Sangtea chu a en reng ringawt a. Pi Ruati lah chu a lo nui vur vur thung a,"Vawiin leh zanin chu lu lam leh mawng lam hre lo in i awm dawn nia,"a lo ti fiamthu hlut a. Msi chuan,"Thingtlangah chuan engnge i tih dawn a?,"a lo ti hâ mai a. Sangtea chuan,"Ka pa in zu ka nghei theih nan min thawn bo dawn,"tih pahin no 1 dang leh chu a tlak leh pawp mai a. Msi chuan,"No engzatnge i in tawh a?,"a lo ti sap a. Sangtea chuan a kut ṭang 5 rawn tih pharh pahin,"Ka chahthlak hma chu ka in dawn a ni tawp mai ni ,"a ti leh a. Pi Ruati chuan,"No 5 kha a tawk tawh aw,i haw theilo palh ang. Khawi dah tawh ang,"tih pahin dawhkana no vel chu a senghawi nghal sawk sawk a.
Previous
Next Post

No comments:

Thanks for your comment.