THLAWHNAAH KA CHUANG VE A!

Tluangpuia Hilthang

          Khawvel thlawhna tumhmun lun bera an sawi, Atlanta International Airport te, India ram a lun ber Indira Gandhi International Airport Delhi te chu, mang lam ah pawh la hmu lo mah ila. Hmarchhak bial a thlawhna tumhmun lun ber, India ram ah pawh sawm pakhat na lai ni phak, Bordoloi International Airport Guwahati atang a thlawh chhuahna tur ticket chu, ka hum vang tawh a.
        Vawikhat pian ve man ah, thlawhna ah vawikhat tal han chuang thei ila, ti a ka lo suangtuah thin chu a tak a thleng dawn a ang ta hle mai. Minute 50 vel chuan nan a Cheng 8125 ngawt han sen chu, kawng leh lam ah chuan ka ui hle mai a. Thingtlangpa nikhat ah hah thi kul a thawh pawh  cheng 200 hlawh thin tan chuan a sang deuh a ni. Sumo in cheng 900 ka seng ang a, a bang chuan chawlhni chiah a sa hmeh thin kan nih hre reng in, Hotel ah sa plate hn lo ei ta ila, a la chuang teuh dawn a. Ka nau fate Rum pum leh Wai Wai, ka hawn thei ang a, Pocket Money tur ka la hlep thei bawk ang, tih te ka ngaihtuah a. Nimahsela, ka thlawhna tur hi, kan pi Mapuii'n min tum sak a ni miau a. Thlawhna ka la chuan loh thu a hriat in, ka hriat loh in ticket a lo la fel diam a. Kan thlawh chhuah hma zawng chu a ticket ringawt pawh, ka thlir nitin mai a ni.
        August 9, 2015 kan thlawh ni tur chu a lo thleng a. Dar 12: 30 a thlawk tur kan nih avang chuan, zing dar kua ah Airport thleng min hruai tur a kan pi in a lo ruahman, Swift var chuan min lo lam a. Airport hi darkar thum vel tlan a ni a, kan kal zui nghal mai a. Shillong khawpui chu thla hnih chhung vel atan ka mangtha ta rih a. Nongpoh ah thingpui in zuai in, dar 12 ah Airport chu kan thleng ta a.
        Thlawhna a chuang thin ten, kan thenawm nula ke zeng an nawr na ang deuh a. An thawmhna an nawr lai fb a an post thin, ka lo hmuh thin ngei mai ah chuan ka thawhnaw chu kan nawr ve ta hnak hnak a. Thla han lak a han post ve chu ka chak viau na a. Nawr chung a thla lak a harsat avang in, ka la ta lo mai a. Building chhung lam ah kan  lut dawn a. Kan ID an lo chek zel a, an check fel hnu chuan a chhung ah kan lut ta a. Kan thawmhnaw te kan han buk a, a chhung ril leh zual pan in, check chi hrang hrang chu kan hma chhawn zui a. Vawi thum vel min check hnu ah, a hnuhnung ber tur min check lai chuan ka buai ta, ka phone kha ka kekawr ipte ah ka lo ak pek a. A hran a hand bagage a lo dah tur kha a ni a, kan va dah leh a check chu ka pal tlang ta. Thlawhna a chuan chiah chu ka hma bak ta.
      Kan naupan lai ka ngaihtuah a, Helicopter lo thlawk kan hmuh a, Bye bye pah a kapu ka lo chuang ve, kan tih lai mitthla ah a lang uar uar a. Kan thian thenkhat a mit var zual ten, a khalh tu ka hmu min rawn bye bye let, an han ti a. Thenkhat in, a lu pawh ar bawm tiat an han ti zui a. Min bye bye lai, hmu ve lo ten, kan awh thin zia kha. Ka lungte pawh a chhe rum rum mai. Phur tawh nak a lai chuan, tlai dar 4 ah chhuah zawk tur tih an rawn puang a. Tih theih dang awm hek lo, dar li chu kan han nghak ta. Thil han lei dawn in a let in a to vek tawh mai a. Man awm lo ber tui kan in tlut tlut mai a, In zin deuh chuan kan zung zing deuh a ni mai a.
        Tlai dar li a lo thleng ta, Bus ah chuang in thlawhna chu kan pan ta. Bus atang a chhuk in, thlawhna a lut tur in leih lawn kan zawh chho ta. Ka mumang a lo ni reng em? tiin kan in sik a. Na ka lo la hriat avang chuan, a tak ngei a nih hi ka ti ta a. Thlawhna seat hnung ber, darthlalang bul ah ka thu a. Ka bul ah chuan vaipa pakhat, dulkiar ve lam pang hi a thu a. Han be lum lam dawn ila, Hindi ka lo Malum em em bik si lo. Kohhran Upa thut in, hmui faifuk tep in ka thu ta zawk a. Chutah le, thlawhna chu an rum ta ham ham a, a che ta tual tual a, a tlan ta char char mai. Seat Belt hreng turin min rawn ti a, ka hreng zo chiah maw tih chuan, a hmalam chu a kang a kan pum kan zui chu a ni ta mai a. Han hlauhna em em ka nei hran lo. Ka taxi driver ngaihtuahna ka lo hmang hman a. A kan dawn chiah khan, neutral atangin no 1 ah a lut  ang em ? Gear thlak dawn in clutch an rap ve ang em ? A clutch a nem nge a sak ang ? Kan thlawh chhuah hma, kan tlan lai khan kan chak si a, a kual thut mai nen Power Steering a ni ang em ? Ni ta lo se, a khalh tu tan a steering kha tuai vir chak a ngai awm. Pilot ni tur chuan, ban tha chak leh kut ran, a ngai awm si a. Ban lian viau e, ti lo in, ka tuan fum in, ka ban tha a chak si lo. Lehkha thiam in, lo hmeltha pawh ni ila, Ka tling dawn lo a nih hi, tih te ka ngaihtuah a.
           Kan chuanna hi a lian lo a, mi sawmriat vel kan chuang a. Jet Airways a nih avang chuan, Air India te ai chuan indo thlawhna kan ang in kan hre ngawt pek a. Jet Fighter kha rilru ah la thi bik hek lo. A darthlalang a tang a hnuai lam kan thlir thla a, Chhum te kan chhuk thlir zet zawng hlauhna a lo lut ta. Rilru tawngtaina ka nei nghal a. Sa hmeh dawn tuk, chawhmeh suah vek tawh hnu a tawngtai nen chuan in tak hleih tak a ni. Hlimna atang ai chuan, mangana atanga Pathian auh hi, rilru zawng zawng in a awl, an ti thin a. A dik ka ring ta khawp mai.
          Air hostess ho chuan tuium te reuh te te an rawn sem a. An hmelthat theih thu an sawi kha ka hre ve si a. Cher sang lam pang ni tur a ka ngaih kha, thau tawi lam pang kan veng Gorkhali Bawngpu, Deepaka nupui Maya-i ang zet mai a lo ni a. Sanwitch sa telh nge telh loh kan duh min zawt a, sa ei khat tih tak ah sa telh bawk chu kan thlang a. Ka bula Vaipa tih dan chu ka en ru zel a. Kan hma a mi kha dawhkan a lo ni a, an pawt chhuak ta a. A tih ang zel chuan kan pawt chhuak ve nghal a. Dawhkan ah chuan kan in chhawp ve a, kan ei ve ta malh malh a. Tui kha a la in miah lo a. Engemaw an rawn sem leh ang a, chumi nen a in tur a ni ang ka ti a. Engmah lah chu an rawn sem si lo. Nakin ah chuan a in ta a in zo ta vek mai a. Tui hi chu thlawhtheihna chhung pawh ni se, a hal hun a piang hi a in hun a ni, tih te kan hre thar a. Tluang takin Lengpui Airport ah chuan kan tum ta a, kan in pawh tluang takin ka thleng ve thei ta a ni.
       Thla hnih Mizoram ka cham hnu kan haw thla leh chu, Lengpui Security a lo thawl nge ? A bu ang thlap in ka che tawh a. Thil tamtak chu tih than a thiam a nih hi, ka tih phah ta a. Nula bem tih chauh lo chu !!

Previous
Next Post

No comments:

Thanks for your comment.