LENRUAL HLUI

Ziaktu: C. Lalthazuala

Lunglei khawpuia inkulh zosap Missionary Mrs Chapman (Pi Zirtiri) Hmeichhe naupang enkawlte zinga lehkhathiam thei bik Chalchani chu Pi Zirtiri chuan a enkawl tirh atangin Zirna lama amah pui theitu tur a ni tih a hre chiang hle a, a lo tleirawl chhuah phat atangin chhim lam biala khaw hrang hrangah Sikulte dina bul tan turin a tir chhuak nghal a. Kum 1939 ah Thingsai khuaah sikul din turin Pi Zirtiri hian Chalchani chu Pi Nuchhungi nen a tir leh ta a, Pi Zirtiri hian Hmeichhe sikul din tura tirchhuak a ni ber a. Tichuan Chalchani chu a pasal Hrangkaia nen Lunglei Zohnuai atangin Thingsai lamah an pem chho ta a ni. Hrangkaia hi rimawi ngaina tak a ni a, Thingsai khuaa an pem chhoh hian Tingtang a keng tel nghe nghe a, Hrangkaia Tingtang ken tel hi Thingsai khaw chanchin a, Thingsai khuaa Tingtang lakluh hmasak ber a ni nghe nghe a ni.

Hrangkaia leh Chalchani te nupa hi fanauah an tluang hle a, Hrangkaia hian fabik pakhat neiin, a  fabik nen fa pakua, mipa 7 leh hmeichhia 2 an nei a. Hmeichhia pahnih te hian hla an phuah ve lem lova, mipa pasarihte hi chuan a hunlaia zoram dengchhuak hla lar tak an phuah vek a ni. Hrangkaia leh Chalchani te hrin, mipa fa zinga upa ber Remsanga Hnamte hlaphuah, ‘Vang a ni’ tih hla phei hi chu tun thlenga hriat hlawh a ni a, Remsanga Hnamte chhang chiah Lalthangliana Hnamte hla phuah lar tak tak zinga “Lenrual hlui” tih ngat phei hi chu hla daihrei tur chi a ni a, Zofaten khawvel tawp thleng kan sak tawh tur a ni a. Hetiang taka hla tha leh mawi, mite rilru hneh ngawih ngawih, mite rilrua bu khuar nghet tlat “Hla Lungtileng” phuahtu Lalthangliana Hnamte chanchin hi a ngaihnawm dangdai teh a sin, Lalthangliana Hnamte chanchin lam i han thlur bing teh ang aw.

Missionary Pi Zirtiri pumchhuak Chalchani fate ho hi lehkhathiam thei filawr tak anni vek mai a, annu leh paten zirna lamah rual an el em em bawk nen, Lalthangliana leh a u Remsanga Hnamte te hi an unauin Aizawlah lehkhazirin an awm a, an Patea H.Lalliana, Chanmari inah awmin St. Pauls High School ah nitin sikul an kal thin a ni. Nikhat chu an unauva sikul kal tura an chhuak dun kalkawnga an inzui rial rial laiin Indian Air Force fighter te chuan Aizawl khawpui an rawn bomb ta ul ul maia, khawpui chhunga mi zawng zawng chu mangang takin an chiai zo ta a, mi chitin mai chuan an sahim nan khawpui an chhuahsan dur dur mai a, Lalthangliana leh a u Remsanga pawh chu an inthenta phawk mai a, Mizoram buaina chuan a vanglai a thleng chho ta bawk a, Aizawl khawpui leh Mizoram hmun tam takah inkahna rapthlak tak tak a thleng chho ta bawk nen, Pathian leh kan ram tan tia  Mizo Hnam Zalenna sual tu MNF underground sipaite chu an unau hian inhre tawn miah lovin an lo zawm ve ve a lo ni a. Fighter in Aizawl a rawn bomb chiaha mipui phili sung sung kara an inthen hrang ta daih mai kha, a hnu feah MNF Headquarter, East Pakistan, tuna Bangladesh-ah hian an inhmu leh ta hlawl mai a nih chu.

Lalthangliana Hnamte leh a u Remsanga Hnamte in MNF Ramhnuai sipai an zawm hnu rei vak lovah Lalthangliana Hnamte chu a pa thuawihin, Thingsai khuaah a haw ta a, a pa chuan zirna chhunsawm leh turin Shillong lamah mittui tla zawih zawihin a tir liam ta a ni. Lehkha thiam thei tak a nih avangin Matric First Division ah passed in Shillong College hmingthang ber St.Edmonds ah zirna chhunzawm zelin B.Sc first Division a a passed hnuah Thingsai khawtlang hruai tute ngenna angin Thingsai High Schoolah Science & Mathematics Teacher hna a thawk nghal a, Thingsai khaw High School ah hian kum 15 vel zet a thawk a ni.

Thingsai High Schoola a thawhlai hian Pathian thu avangin a nun chu a inthlakthleng ta hlawk mai a ni ber ang. Piantharna a chang ta a, a tleirawl laite, Shillonga lehkha a zirlai te, MNF underground Hnam Pasaltha a nih laia a nuna thil la thleng ngai miah lo chu a lo thleng ta a, khawvel nunkawng a zawh lai pawha, thawm na ve tak, nawmchenna khawvel lamah pawh tawn hriat ngah ve takin, sakhaw lam tluang a han zawhta chu a thawm pawh a na nghal hle a. Lehkhathiam leh thusawi thiam, thian siam thiam tak leh thenrual kawm thiam a lo ni sa ve hrim hrim bawk nen, a Pathian thu sawi leh rawngbawlna te chu Thingsai khaw mipui tam takin an hlutin amah pawh miten an ngaina nghal ta hle mai a. A thawm lian tak mai leh a rawngbawlna chak tak mai chu a kal firfiak ta deuh nge ni? Thingsai Baptist Kohhran puipate nen chuan an inkawp rem theita meuh lova, Lalthangliana Hnamte leh a rawngbawlna ngainatute chuan, an lawina kohhran chhuahsanin, Rinna kohhran “Church of Faith” an din ta a ni.

Thingsai khuaa “Church of Faith” lo dingta mai chuan Thingsai Baptist Kohhran a tiphel deuh thaw nia sawi a ni nghe nghe a, amaherawhchu, kohhran Upa leh ziding zawk na na na chu, a hnu deuh lawkah a ngaiin a kal leh thuai a, a sarhu lai chuan Thingsai Baptist kohhran a phel tia sawi theih anih thu Thingsai khawpa ngeiin a sawi a ni.

Lalthangliana Hnamte chuan High School Zirtirtu a nihna bansanin Rinna Kohhran enkawlna lamah a nun pumpui chu a hmang ta a. Lunglei khawpuiah Hmunpui ber siamin Mizoram khaw hrang hrangah Rinna kohhran chu a ding ta nual bawk a. Lalthangliana Hnamte chuan a kohhran thar dinah chuan Secretary leh Pastor mawhphurhna a kawp ta nghal a, thusawi thiam tak leh mi hnehtheihna mak tak mai a neih tlat avangin “Rinna kohhran” pawh chu a changtlung chak hle mai bawk a. Lalthangliana Hnamte ngeiin thutchilhin, Lungleiah a awm ta chawt a, thahnemngai taka Pathian rawng a bawl lai chuan a nun nghawng na em em tu vanduaina in a rawn tlakbuak ve ta tlat mai le.

Lalthangliana Hnamte hringtu nu Chalchani chuan kum 1990 khan a khawvel zinkawng a lo zawh tawp ta a, Missionary Pi Zirtiri kutchhuak, fate enkawl thiam tak thihna lungchhiatthlak tak chuan a fapa upa ber dawttu Lalthangliana nun chu a nghawng na hle mai a, a nu boral hnu, rei vak lovah, a nu ngenna ngai pawimawhin Baptist kohhranah a rawn let leh ta a ni. Rambuai laia a pa thu zawma, mittui tla zawih zawih chunga Shillong lama lehkha zir tura tirh liam a nih thu kan sawi tawh nghe nghe kha, a nu thu heti taka a ngai pawimawh hi a ropui hle mai.

Baptist kohhrana a rawn let leh hnu reiloteah Serampore ah B.D. a zuk zir leh a, B.D a zawh hnuah Pastor a nemngheh a ni nghal a, Lawngtlaiah rawngbawlin a awm hmasa ber a, Serchhipah reilote a awm hnuin Lawngtlaiah bawk sawn leh a ni a, Lawngtlaia awm leh hnu hian Executive Secretary (ES) ah thlan a ni a, Executive Secretary (ES) hna hi term hnih lai Lawngtlaiah hian a chelh nghe nghe a ni. Executive Secretary term, tum hnih a chelh hnuin, Mizoram Baptist Kohhran hmun pui ber Lunglei Serkawnah Christian Education Director hna chelh tura sawn a ni leh ta a, chumi hnuah Pastoral Co-ordinator hna term khat chelh tir leh a ni a, chumi hnuah kohhran High School enkawl “Jubili High School” Serkawnah a thawk leh ta a ni. August thla kum 2013-ah a pension tawh dawn a, a pension thlengin zirtirtu a nih tawh hmel viau mai.

Kum 1970 tir lama Lalsangzuali Sailo hla lar tak tak, Mizoram dengchhuak hla lar a neih hote kha Lalthangliana Hnamte hlaphuah deuh vek a ni nghe nghe a ni. tin, Lalthangliana Hnamte chhang chiah, zaithiam hmingthanga leh hlaphuahtu ropui nibawk Zira Hnamte hlaphuah leh a u Lalthangliana Hnamte hlaphuahte hi Lalsangzuali Sailo hla lar ber ber annih mai bakah tun thlenga hriathlawh, hla lar reh theilo an tih zinga mi an tling phak vek a. “Lenrual hlui” tih hla ngei pawh hi Lalsangzuali Sailo in a larpui hmasa ber a, Zoram dung leh vanga, mite hriata phochhuaktu pawh a ni nghe nghe a, Lalsangzuali Sailo in a lar pui hle hnuah, a hunlaia All India Radio Aizawl Artist lar ber pawl Vanlalhmangaihin a larpui leh hle bawk a. He hla hian hringnun kalsiam hi a hrilhfiah chian em avangin mihring pangngai rilruah chuan a tlana lo theilo a ni. Zaithiam hmingthang leh hlaphuahtu ropui Zira Hnamte hi chuan kum 2001 khan a u Lalthangliana Hnamte hlaphuah hi Radio ah a dah chho ve ta chauh a, kum 2001 kuma “Suden Muanga” tih Album a siam tuma a hla thenkhat Radio-a a pek chhoh zingah a telve a ni.

Recording Studio te a lo changtlung ve ta a, JER Recording Studio a, Zira Hnamte in a sak, AIR Aizawl Station a pek chhoh ve tak hi, a recording quality a that bakah, a satu Zira Hnamte hian a sa fuh ve hrim hrim bawk a, he hla mawi dangdai leh lungtileng “Lenrual hlui” tih hla satu zawng zawng zingah Zira Hnamte, he hla phuahtu nau, a chhang chiah sak hi a fuh ber lawrlak niin a lang. Zira Hnamte hian a lo sa har deuh a ni, a u Lalthangliana Hnamte hian Shillonga lehkha zirlai, St. Edmonds College a a kallai, kum 1972 kuma a phuah daih tawh a lo ni lehnghal a, Zira Hnamte hian lo sa ve thuai se he hla rilzia leh mawizia hi kan hre hma lehzual tur a nia sin mawle !!!

Zira Hnamte (Zirkunga) hi Mizorama TV programme te a la awm hma daih, Guwahati - Shillong Radio Station a Mizo Programme reilote kan neihve hunlai atang tawha Mizo mipa Radio Artist lar ber pawl lo ni tawh a ni a, 1970 hnu lama AIR  Aizawl Station a lo awmve tak hnuah Radio Artist lar ber pawl ni chhunzawm chho zelin, a vanglai chuan ani baka Radio Artist thawm nei lian leh huhang ngah hi an awm bik lo reng reng a ni.

Zokhaw nuam leh boruak thengthaw tak, Zolentu mawi taktak ten an chawivel, Thingsai zokhaw nuam taka naupan lai hun hmang, ni 3.8.1948 a piang, St. Pauls High School a kallaia Ram leh hnam tana Ram mu a lo penchhuak ve tawh, a pa thu a awih avanga, Ramhnuai atanga rawn haw a Shillong khawpui lama lehkha zir tura mittui tla zawih zawih chunga chhukthla, St. Edmunds College leh Shillong khawpui mawi taka kum engemaw zat laitual zuk leng, St. Edmunds College atanga BSc a zawh hnua, Thingsai High School a kum 15 vel thawkzui leh, a pianthar avanga a sawrkar hna thawlai bansana, Pathian rawngbawlna lama lut a, Serampore atanga BD a zawh hnua, Mizoram Baptist kohhran Pastor lo ni ta, Rev. Lalthangliana Hnamte hian a nunhlui liam hnu, kohkir theih ni tawh si lote chu a hrechhuak ve fo thin a ni ngei ang le!! He hla lungtileng leh lungtirun tak hi a lo phuah chhuak tlat mai. He hla “Lenrual hlui” tih hla thu mawi tak ngei hian a tawp i han  khar leh teh ang u hmiang.

LENRUAL HLUI

Phuahtu : Rev. Lalthangliana Hnamte
Phuah kum : 1972
Sa tute : Lalsangzuali Sailo, Vanlalhmangaihi, K. Lalchamliana, Zira Hnamte, Saitual Branch YMA Zaipawl

1. Aw khawnge lenrual  hlui zawngte kha,
Hmanah chuan nauvang nui za thin kha;
Hlim leh lawmin tlaitla eng hnuaiah
Duhthu leng tinkim kan sam za thin.

Mahse khuarei an chang leh si
Heihi maw lo ni le lunglen;
Mahriak ten luaithli pui nul zelin,
Hlim lai ni kha ka tahpui tang e.

2. Min hnemtu awm hian ka ring love,
Khuarei hian min la hnem ve mahna;
Tia ka han dawn chang ni pawh hian,
Lunglen tizualtu mai lo ni e.

3. Aw hlimlai, aw hlimlai, hlim lai ni,
Tap tapin ka au ding zo si lo;
Lenrual hlui zawngte kha khawiah nge,
Damlai khawvelah tawng leh i maw.

Previous
Next Post

No comments:

Thanks for your comment.