I LOVE YOU, GOOD BYE!

Thlah che hi harsa mahse, ka thlah che a tul tih ka hrai sin, mahse, kan lo zawh dun tawh hmangaihna kawng hi midang zawh pui tur chuan ka zuam mawlh si lo, kan nunhlui ka chhui kir a, kan tiam thu thlun dun ngei te chu sut si loin an liam a tul a, hmalam hun duhthu kan sam dun te chuan suangtuahna ramah min thamral zawh san ta si a.

I lo kir tawh dawnlo tih hrereng mahila, ka la beisei ruk reng erawh chu hun chu a ni si a. I tel lo hian ka tlei zo lo a ni lova, ka hlim a kim theilo mai zawk a ni. Ka hlimna ber ni thin kha tunah chuan ka lungngaih, tahna min thlen tu mai i lo ni ta zawk si a. Tap turin ka lo nui a, lungngai turin ka lo hlim reng thin tih hi ka lo suangtuah ngai hauh lo a sin. Mahse, tunah chuan chu hun chu a tak ngeiin ka tawng ta si a. Midang ta emaw ka tih kha ka ta a lo ni ve ta reng mai si a, hriatthiam a van har tak em..

Ka lenrual te pawn min hnem an tum thin, mi te pawn a tawk ve tho alawm tiin keimah leh keimah hi in hnem chawp ka tum a, mahse, mi te thinlung ang ka neih loh vang te pawh a ni mahna. nge ni a, ka tawrh ang tak hi an tuar ve lo zawk tiin ka in zawt leh thin.

Min hmangaih ngawih ngawih tu te kalsan chu a tawrh dan pawh a ziaawm mahna, mahse, kan hmangaih ngawih ngawih ten chan leh vang awm lova min kalsan tluka na hi a awm dawn chuang em ni.. Min kalsan mahla ka hmangaih reng ang che..

I piallei taksa mawina te an lo chuai a, hmangaitu che an kalbo hunah pawh keichu i tan ka awm reng ang tih hi i lo hrereng thin dawn nia aw.

Mahse, tunah chu I LOVE YOU GOOD BYE ka tih a ngai rih tlat si a.

A chhan chu.. Beisei tur i awm tawh lo tih hrereng chunga beiseina nena ka la thlir reng che chuan, i hlimna duh tu ber hian ka ti lungngai ang che tih ka hlau a, kei thinlunga hmangaihtu che pawh kalsan duh khawp thinlung put tir tu che khan hlim takin a siam ngei ang che tih beiseina nen a nia ka thlah zawk che ni..

I LOVE YOU GOOD BYE

Ziaktu- Fijiko

Previous
Next Post

No comments:

Thanks for your comment.